Otandastarymyz úshin sheteldik áýe reısteriniń de baǵasy qoljetimdi bolmaq.
Qazaqstan men Ońtústik Koreıa arasynda alǵash ret loýkoster ıaǵnı búdjettik áýe kompanıasynyń ushaqtary usha bastady. Alǵashqy reıs Ońtústik Koreıadaǵy basty áýejaı Inchhonnan shyǵyp Almatyǵa sátti qondy, dep habarlaıdy aqshamnews.kz 24.kz-ke silteme jasap.
Ońtústik koreıalyq loýkosterdiń ushaqtary Inchhon men Almaty arasynda dúısenbi jáne juma kúnderi qatynaıdy. Alǵashqy jolaýshylardy áýejaıdan shyǵaryp salýǵa áýe kompanıasynyń prezıdenti men Qazaqstannyń Ońtústik Koreıadaǵy elshisi keldi.
Nurǵalı Arystanov, QR Koreıa Respýblıkasyndaǵy Tótenshe jáne ókiletti elshisi:
- Qazir eki elge aptasyna orta eseppen 15 reıs júzege asyrylady. Sizder Almatyǵa taǵy birneshe reıs qostyńyzdar. Bul ekijaqty yntymaqtastyqtyń qarqyndy damyp jatqanyn kórsetedi jáne týrızm salasyndaǵy almasýdy arttyrýǵa septigin tıgizedi. Saıahatshylar qarasy jyl saıyn 12 paıyzǵa ósip otyr. Bul óte jaqsy kórsetkish.
Loýkoster reısiniń ereksheligi - bortta bıznes-klass oryndarynyń bolmaýy jáne tamaqtyń bólek aqymen berilýi. Degenmen, bul alǵashqy jolaýshylarǵa kedergi bola qoıǵan joq. Ushaq saparlaýshylarǵa toly boldy.
Aleksandra Hvan, Almaty qalasynyń turǵyny:
- Qazir osy kompanıamen ushý eki ese arzan. Ásirese júksiz baryp-qaıtý úshin óte tıimdi. Bastysy tez ári arzan.
Evgenıa Shaı, kásipker:
- Sońǵy ýaqytta janarmaı baǵasy qatty ósti. Osyǵan baılanysty áýe bıletteri de qymbattady. Al únemdegisi keletinder úshin jańa reıs óte tıimdi. Bıletterdiń aldyn ala satylyp ketýi, ushaqta bos orynnyń bolmaýy oǵan suranystyń joǵary ekenin kórsetedi.
Inchhon - Almaty baǵytymen alǵash ushqan jolaýshylar arasynda ońtústikkoreıalyqtar kóp boldy. Bul kompanıanyń óz saıtynda Almatynyń kórikti jerlerin keńinen jarnamalaýynyń nátıjesi bolýy múmkin.
Choı Do Iýn, Seýl qalasynyń turǵyny:
- Parıj nemese Nú-Iork sıaqty tanymal baǵyttardyń ornyna qazir trendke aınalǵan elge barýdy jón kórdim. Qazaqstandy Ortalyq Azıanyń «Shveısarıasy» dep ataıdy. Sondyqtan Almatyny tańdadym. Alǵashqy kúnderi tabıǵatpen tanysqym keledi. Kólsaı kólderi men Sharyn shatqalyna barý josparda bar. Sodan keıin shahardyń ózindegi Ortalyq murajaı sıaqty nysandardy aralamaqpyn.
Osy jazda eki el arasyndaǵy áýe reısteriniń sany aptasyna 20-dan asýy múmkin. Loýkoster Ońtústik Koreıanyń kúngeıindegi eń iri qalasy - Pýsandy Almatymen tikeleı baılanystyratyn bolady.