Petropavldaǵy oqıǵadan keıin mektepterdegi qaýipsizdik máselesi erekshe nazarǵa alyna bastady.
Almaty bilim oshaqtaryndaǵy beınebaqylaý, táýlik boıǵy kúzet, týrnıket sekildi qaýipsizdik júıeleri endi zamanaýı tehnologıamen tolyqtyryldy. Dálirek aıtqanda smartfondarda keńinen tanymal Face ID júıesi mektepterde de paıdalanyla bastady. №34 gımnazıanyń muǵalimderi týrnıkette ornatylǵan kameraǵa tike qaraǵanda ǵana mektepke kire alady, dep habarlaıdy Almaty-akshamy.kz 24.kz-ke silteme jasap.
Smartfonda keńinen tanymal Face ID qaýipsizdik júıesi bul bilim berý mekemesine qyrkúıekte ornatylǵan. Ázirge baǵdarlama qyzmetkerlerdi ǵana tanıdy.
Eger ata-analar ruqsat berse, oqýshylardyń da bet-álpetin engizý josparda bar. Sol arqyly balalardyń mektepke kirgen jáne shyqqan ýaqyty áke-sheshelerine sms arqyly habarlanady. Ázirge oqýshylar arnaıy karta arqyly kirip shyǵady eken. Gımnazıanyń kire berisindegi 4 týrnıketke 4 Face ID kamerasy men magnıtti kartany oqıtyn júıe ornalastyrylǵan. Barlyq aqparat ortalyq kompúterge júktelip otyrady.
«Bizdiń mektepte 2154 bala oqıdy, 180 adam jumys isteıdi. Ortalyq kire beristegi «Skýd» júıesi úsh jerde ornalasqan 6 týrnıketpen jabdyqtalǵan. Árbir týrnıketten kirgen oqýshylardyń kartasy arqyly kelgen jáne ketken ýaqyty jazylyp otyrady», - deıdi №34 gımnazıanyń dırektory Rýstam Djahanov.
Bilim berý mekemesiniń málimetinshe, Face ID júıesi eń joǵary qaýipsizdik sanatyna jatady. Oǵan qosymsha, mektep aınalasyndaǵy 121 beınebaqylaý kamerasynyń 21-i polısıa departamentiniń jedel basqarý ortalyǵyna qosylǵan.
«Gımnazıanyń keshendi qaýipsizdik júıesi arnaıy kúzet qyzmetimen qamtamasyz etilgen. Mektep aýmaǵynda úsh kúzet pýnkti bar, ekeýi ǵımarattyń ishinde. Olar ár eki saǵat saıyn mekteptiń ishin jáne aýmaqty aralap tekserip otyrady», - deıdi №34 gımnazıanyń dırektory Rýstam Djahanov.
Mektepterdegi qaýipsizdik basty nazarda. Qazirgi ýaqytqa deıin qala boıynsha 41 mektepke Face ID júıesi ornatylǵan. 98 mektepte karta arqyly ashylatyn týrnıket bar. Oǵan qosa 214 mektepke dabyl batyrmasy jumys isteıdi.