Almaty Onkologıalyq ortalyǵynyń onkogınekologıa bólimshesiniń meńgerýshisi Raıhan Bolatbekova Óńirlik komýnıkasıalar qyzmetinde ótken brıfıńte APV-ǵa qarsy erte dıagnostıkalaý men vaksınasıalaýdyń mańyzdylyǵy týraly aıtyp berdi, dep habarlaıdy aqshamnews.kz
Onyń aıtýynsha, Qazaqstanda jatyr moıny obyryn skrınıngten ótkizýdiń ulttyq baǵdarlamasy bar, ol 30 jastan 70 jasqa deıingi áıelderge sıtologıalyq zertteýdi paıdalana otyryp júrgiziledi. 2024 jyldyń qyrkúıeginen bastap mektepterde ata - analarynyń kelisimimen jasóspirim qyzdardy vaksınalaý baǵdarlamasy bastaldy. 30 qyrkúıek pen 14 qańtar aralyǵynda Almaty mektepterinde 600 –den astam jasóspirim qyz vaksınasıalandy.
APV vaksınasy kóbinese jatyr moıny obyryn týdyratyn vırýs túrlerine baǵyttalǵan. Júrgizilgen zertteýler vaksınalar uzaq merzim qorǵaıtynyn kórsetti. Zertteýlerde vaksınany engizgennen keıin 10 jyl ishinde vaksınalardyń ımmýnogendiligi tómendemegeni dáleldendi. DDSU bul vaksınany qaýipsiz jáne tıimdi dep maquldady.
Jatyr moıny obyry (JMO) áıelder arasynda jıi kezdesetin onkologıalyq aýrýlardyń biri bolyp otyr, deıdi spıker. Halyqaralyq qaterli isikterdi zertteý agenttiginiń (ıýmálimetteri boıynsha, álemde 2020 jyly bul aýrýdyń 604 000 jańa jaǵdaıy tirkeldi, bul belsendi profılaktıkanyń qajettiligin kórsetedi. Respýblıkada JMO onkologıalyq aýrýlar boıynsha ekinshi orynda, jyl saıyn 2000-nan astam jańa jaǵdaı tirkeledi.
Jatyr moıny obyrynyń damýynyń negizgi sebebi-adam papıllomavırýsy. Aýrýdyń 97% - y osy vırýspen baılanysty. Raıhan Bolatbekovanyń aıtýynsha, «JMO erte anyqtaý jáne APV aldyn alý aýrýdyń damý qaýpin aıtarlyqtaı tómendetýi múmkin». Almatyda 2024 jyly jatyr moıny obyrynyń 206 jaǵdaıy anyqtaldy. Aýrý negizinen reprodýktıvti jastaǵy áıelderge áser etedi, 40-44 jastaǵy áıelder arasynda kóbirek kezdesedi.
«Vaksınasıamen qamtamasyz etilgen uzaq merzimdi qorǵanys densaýlyq úshin eń utymdy jol», – deıdi dárigerler. Osylaısha, Almaty Onkologıalyq ortalyǵynyń onkogınekologıa bólimshesiniń meńgerýshisi Raıhan Bolatbekova atap ótkendeı, vaksınasıa jáne skrınıng baǵdarlamalaryn engizý elimizdegi jatyr moıny obyrymen syrqattanýshylyq jaǵdaıyn edáýir jaqsartyp, Qazaqstan áıelderi úshin qaýipsiz bolashaq jasaı alady.