Almaty qalalyq máslıhatynyń depýtaty Qarashash Júzeeva jumys pen oqý ýaqytyn ózgertý arqyly tańǵy jáne keshki qarbalas sátterde kólik keptelisin azaıtýdy usyndy. Bul bastama qaladaǵy kólik aǵynyn retteýge jáne turǵyndardyń ómir sapasyn jaqsartýǵa baǵyttalǵan.
Usynysqa sáıkes, eki aýysymdy oqytý júıesi bar mektep oqýshylary men stýdentterdiń sabaqtary jarty saǵat erterek - tańǵy 7:30-da bastalýy múmkin. Al kásiporyndar men holdıńterdiń jumys kúni saǵat 9:00-den 8:30-ǵa aýystyrylsa, jeke kompanıalar - bank, úkimettik emes uıymdar, notarıaldyq keńseler men jarnama agenttikteriniń qyzmetkerlerine qashyqtan jumys isteý formatyna kóshý qarastyrylyp otyr.
Depýtat jeke mektepterge de nazar aýdardy: olardy oqýshylar úshin avtobýs jaldaýǵa shaqyrdy. Bul shara tańǵy ýaqytta jeke kólikterdiń sanyn azaıtýǵa múmkindik beredi.
Júzeevanyń aıtýynsha, mundaı ózgerister jol qozǵalysyn jeńildetip qana qoımaı, qala turǵyndarynyń ýaqytyn únemdeýge jáne ekologıalyq jaǵdaıdy jaqsartýǵa sep bolady.
"Kolejder men joǵary oqý oryndaryndaǵy sabaq bastalý ýaqytyn, iri uıymdardaǵy jumys kestesin ózgertý joldy bosatyp, qalalyq ınfraqurylymnyń tıimdiligin arttyrady. Óıtkeni shamadan tys júktelgen jol aýa sapasyna da, turǵyndardyń densaýlyǵyna da tikeleı áser etedi", – dep atap ótti qalalyq máslıhat depýtaty.