Komýnaldyq sala qyzmetkerleri qala jáne halyq qyzmetiniń strategıalyq jáne ómirlik mańyzdy máselelerin, atap aıtqanda, sýyq jáne ystyq sýdy, elektrdi úzdiksiz berýde, kóshelerdi jaryqtandyrýda kúndelikti aýyr eńbek etedi, jylytý kezeńinde úılerdi jylýmen qamtamasyz etedi.
Mundaı máseleni máslıhat depýtaty Muhtar Zýleev bastapqyda óziniń praımerızdegi saılaý aldyndaǵy kampanıasy kezinde engizgen. Esterińizge sala keteıik, alǵashqy ashyq dıalog aǵymdaǵy jyly 30 shildede «Almaty Sý» MKK qyzmetkerlerimen ótti. Onda qyzmetkerler óz problemalary týraly aıtyp berdi. Atalǵan sanattaǵy qyzmetkerler kóp jyldar boıy kóleńkede qalyp otyrǵany jáne olarda, mysaly, bilim berý nemese densaýlyq saqtaý salasyndaǵy qyzmetkerlerde memleket tarapynan eshqandaı qoldaý, memlekettik baǵdarlamalar men jeńildikterdiń joq ekendigi belgili boldy.
Búgingi «dóńgelek ústelge» «Almaty Sý», «Almaty jylý jelileri», «Almatyjylýkommýnenergo», «AlmatyEnergoSbyt», «Almaty Qala Jaryq», «Alataý Jaryq» kompanıasy jáne «Almaty elektr stansıalary» sıaqty negizgi jeti komýnaldyq qyzmet kásipodaqtarynyń basshylary qatysty.
Sonymen qatar, memlekettik organdardyń, onyń ishinde Almaty qalasynyń energıa tıimdiligi jáne ınfraqurylymdyq damý basqarmasynyń ókilderi de shaqyryldy.
Máslıhat depýtaty Muhtar Zýleev komýnaldyq qyzmetkerlerdi qoldaý jáne yntalandyrý máselesin kóterdi, atalǵan azamattardy memlekettik ıpotekalyq turǵyn úı baǵdarlamalaryna, áleýmettik qoldaý paketine, medısınalyq qamtamasyz etýge qatysýshylardyń tizimine engizý máselesin qozǵady, sondaı-aq komýnaldyq qyzmetkerlerdiń jalaqy deńgeıiniń tómendigi ózekti aspekt bolyp qala beredi.
«Dóńgelek ústel» barysynda komýnaldyq qyzmetkerlerdi qoldaý boıynsha atalǵan máseleni májilismen Aıdos Sarym qoldap, aldaǵy ýaqytta ony beıindi komısıanyń qaraýyna jáne Qazaqstan Respýblıkasy Parlamentiniń jalpy qaraýyna shyǵarady. Bul - "Halyq únine qulaq asatyn" memleket tujyrymdamasynyń aıqyn kórinisi. Máslıhat depýtattary bastamashylyq etken ózekti máseleler Parlament Májilisi depýtattarynyń arasynda túsinistik tabýda.
«Men birneshe ret komýnaldyq qyzmetkerlermen jáne komýnaldyq kásiporyn basshylarymen kezdestim. Sýmen jabdyqtaý jáne elektrmen qamtamasyz etý boıynsha jumys prosesterine qatystym. Men prosesti jeke kórip, jumysshylardyń ótinishteri men usynystaryn tyńdaǵym keldi. Munyń bári qajetti ózekti aqparatty jınaqtap májilismenderge jolaý úshin baǵyttalyp, olar óz kezeginde osy jobany Parlament deńgeıinde sheshim shyǵaryp, tıisti mınıstrlikterdiń odan ári oryndaýy úshin jasalýda. Osylaısha biz kóptegen otandastarymyzǵa kómektesemiz», - dedi máslıhat depýtaty Muhtar Zýleev.
Kezdesý qorytyndysy boıynsha depýtat komýnaldyq qyzmetkerlerdiń mártebesin kóterý – qazirgi ýaqytta negizgi basymdyqtardyń biri ekenin atap ótti.
Sondaı-aq, RAHYM áleýmettik úıiniń máselesi qaraldy. Máslıhat depýtaty Altynaı Kóbeeva Qarjy mınıstrligi Memlekettik kirister komıtetiniń óńirlik bólimsheleriniń qaıyrymdylyq júkterge salyq salýy týraly máseleni kóterdi.
Áleýmettik úı Qytaıdan qaıyrymdylyq júgin aldy. Tolyq kedendik resimdeýden keıin, 2 jyldan soń Memlekettik kirister komıteti Áleýmettik úıge 14 mln.teńge kóleminde salyq saldy. Nátıjesinde kompanıa bankrottyq týraly ótinish berýge májbúr boldy, al sot prosesteri búgingi kúnge deıin 5 jyl boıy júrip jatyr. Májilismen bul jaǵdaıdy da baqylaýǵa aldy.