Almatyda bıylǵa arnalǵan jergilikti búdjetti naqtylaý úshin qalalyq máslıhattyń XXII sesıasy ótti, dep habarlaıdy aqshamnews.kz
Almaty ákiminiń orynbasary Asqar Ámrın óz sózinde atap ótkendeı, megapolıs búdjetine josparlanǵan ózgerister somasy 83 mlrd teńgeni quraıdy.
«Atalǵan búdjetti naqtylaýda búdjettik baǵdarlamalar ákimshileri arasynda ishki qaıta bólý jáne ótken jyldan bastap 28,1 mlrd teńge somasynda bos qaldyqtardy paıdalaný esebinen paıda bolǵan 54,9 mlrd teńge somasyndaǵy qarajat paıdalanylatyn bolady», - dep túsindirdi A. Ámrın.
Almaty qarjy basqarmasynyń basshysy Qanat Sýhambekovtyń aıtýynsha, atalǵan qarajat qala turǵyndary úshin basym jáne áleýmettik mańyzdy jobalardy iske asyrýǵa baǵyttalatyn bolady. Olardyń biri – bilim berý salasyna. Búdjetti naqtylaý sheńberinde bilim berý salasyndaǵy qarjylandyrý 482,3 mlrd.teńgege nemese qala búdjetiniń 26%-na deıin ulǵaıtyldy.
Memleket basshysynyń «Jaıly mektep» jobasyn iske asyrý jónindegi tapsyrmasyn oryndaý maqsatynda «Aqbulaq» sh/a («Nurly Dala» TK aýdanynda), «Terekti» sh/a, Rozybakıev – Levıtan kóshesinde, «Saıaly» sh/a 5 600 oryndyq 4 mekteptiń qurylysy aıaqtalýda.
Sondaı-aq, mektepke deıingi bilim berý uıymdarynda oryn tapshylyǵyn tómendetý maqsatynda Orbıta-3 sh/a balabaqshany qaıta jańartýdy jalǵastyrýǵa 1,6 mlrd teńge bólinedi jáne №10 shaǵyn aýdanda balabaqsha qurylysynyń bastaldy. Bul 600-den astam balany mektepke deıingi bilimmen qamtýǵa múmkindik beredi. Budan basqa, aǵymdaǵy jyly Túrksib jáne Áýezov aýdandaryndaǵy №83 jáne №155 mektepterdi qaıta jańartý, sondaı-aq qalanyń Bostandyq aýdanyndaǵy №138 mektepti seısmıkalyq kúsheıtý aıaqtalady.
Shahmatty damytýdyń 2023-2027 jyldarǵa arnalǵan Keshendi josparyn iske asyrý maqsatynda jańa oqý jylynan bastap qalanyń 41 mektebin bastaýysh synyptarda shahmattan jańa oqý pánin engizý josparlanýda.
Sonymen qatar, qarjy basqarmasynyń basshysy qosymsha qarjylandyrýdyń arqasynda 2,3 mlrd teńge kóleminde «Shapaǵat» jáne «Alǵabas» sh/a sýmen jabdyqtaý jáne sý burý jelileriniń, sondaı-aq Medeý aýdanyndaǵy káriz jelileriniń qurylysy aıaqtalatynyn habarlady. Bul sanıtarlyq standarttarǵa sáıkes atalǵan aýdandardyń 20 myńnan astam turǵyny úshin sapaly sý men kárizge qoljetimdilikti qamtamasyz etýge múmkindik beredi.
Megapolıstiń kólik qatynasyn jaqsartý maqsatynda Seıfýllın – Jansúgirov dańǵylyndaǵy kólik aıryǵynyń qurylysy jalǵasady.
Otyrys barysynda depýtattar qalada beıbit jınalystar ótkizetin mamandandyrylǵan oryndardy ózgertý, vedimistik baǵynysty uıymdardyń qyzmetkerlerine eńbekaqy tóleýdi arttyrý máselelerin talqylady.
Sondaı-aq, depýtattar jergilikti búdjetke jaǵymdy áser etetin LED-ekrandar túrindegi obektilerge Jarnama ornalastyrý úshin aı saıynǵy tólemaqy mólsherlemelerin ulǵaıtý usynysyn qoldady. Osylaısha, kún tártibinde qaralǵan mindetter qalany odan ári sapaly damytýǵa jáne almatylyqtardyń ómir súrý deńgeıin arttyrýǵa baǵyttaldy.