16 qutqarýshy, 4 arnaıy tehnıka kún-tún demeı jumys isteıdi.
Almaty mańynda qar kóshkini bolýy múmkin degen qaýipti 165 aýmaq bar. Sonyń birinde 17 naýryz kúni 30 myń sharshy metr bolatyn qar kóshkini bolǵan edi. Mamandar bul aýmaqtardyń barlyǵy derlik jiti baqylaýda ekenin aıtady. Alaıda apat aıtyp kelmeıdi, aldyn alý sharalary jıi jasalýy tıis degendi alǵa tartady, dep habarlaıdy Almaty-akshamy.kz Almaty.tv silteme jasap.
Aıyna shamamen 200 myńǵa jýyq kelýshini qabyldaıtyn «Shymbulaq» taý-shańǵy kýrorty kóshkin qaýpi bar aýmaqqa jatatyndyqtan, munda saqtyq sharalary qatań saqtalady deıdi mamandar. Ol úshin tyń tehnıka men tazartqysh quraldary paıdalanylady eken.
Qala jurtshylyǵynyń qaýipsizdigin qamtamasyz etip, qar kóshkininiń aldyn alý úshin 2860 metr bıiktikte 16 qutqarýshy, 4 arnaıy tehnıka kún-tún demeı jumys isteıdi.
Qutqarý qyzmetkerleri ereje buzatyn el-jurttyń da barshylyq ekenin jasyrmady. Olar shańǵy tebetin arnaıy aýmaqtan asyp, qorshaýdy buzyp baryp syrǵanaıdy deıdi. Bul óz kezeginde qardyń opyrylýyna yqpal etetinin jetkizdi.
Qar kóshkini qaýpi áli de bar degen qalalyq «Qazseldenqorǵaý» mamandary 82 myń sharshy metr bolatyn aýmaqty qazir baqylaýǵa aldyq deıdi. Olardyń aıtýynsha, Almatydaǵy Úlken jáne Kishi Almaty shatqaldarynda 165 qaýipti jer bar eken.