Almatyda mektep janyndaǵy 200 jáne qala syrtyndaǵy 19 lager jumys isteıtin bolady
Almatyda mektep janyndaǵy 200 jáne qala syrtyndaǵy 19 lager balalardy qabyldaýǵa daıyn. Osy jaıly jáne lagerlerde balalardyń qaýipsiz demalysy qalaı qamtamasyz etiletini týraly ÓKQ alańynda qalalyq bilim basqarmasy men TJD ókilderi habarlady.
«Almaty qalasynda búginde qala syrtyndaǵy 19 jáne mektep janyndaǵy 191 lager bar. Sondaı-aq, Oqýshylar saraıynda memlekettik «Órnek» lageri bar. Ortasha quny - 100 myńnan 140 myń teńgege deıin. Mektep janyndaǵy lagerlerde halyqtyń áleýmettik osal toptary, kóp balaly jáne az qamtylǵan otbasylar sanatyndaǵy balalarǵa tamaq tegin beriledi», - dedi Almaty qalasy bilim basqarmasynyń tárbıe jumysy jáne qosymsha bilim berý bóliminiń basshysy Janar Saǵyndyqova.
Basqarma balalardyń jazǵy kezeńde qaýipsiz demalýy úshin, bos ýaqytyn uıymdastyrý tujyrymdamasyn ázirledi. Ártúrli jastaǵy balalarǵa belgili bir jaǵdaılarda ózin qalaı ustaý kerektigi týraly sheberlik synyptar men trenıńterde úıretiledi.
«Balalardyń qaýipsizdigi - eń mańyzdy másele. Almaty qalasynyń bilim basqarmasy jazǵy demalysta ádistemelik usynymdarmen súıemeldenetin tujyrymdama ázirledi. Balalar sý aıdyndary men qoǵamdyq oryndarda ózderin qalaı ustaý kerektigi týraly barlyq nusqaýlar bar. Balalardy kim jáne qansha adam súıemeldeýi kerek, aqparattandyrý qalaı júzege asyrylýy qajet. Sondyqtan, eń bastysy-qaýipsizdik. Balalardy kez-kelgen jerge, murajaıǵa nemese tipti saıabaqqa shyǵarmas buryn mindetti túrde qaýipsizdik tehnıkasy boıynsha nusqaýlyq júrgiziledi», - dep bólisti Almaty qalasy bilim basqarmasy qalalyq bilim berýdegi jańa tehnologıalardyń ǵylymı- ádistemelik ortalyǵyń tárbıe jumysynyń jetekshisi Roza Aqmaǵanbetova.
Sondaı-aq, qalalyq TJD lagerler aýmaǵynda qaýipsizdikti uıymdastyrý boıynsha óz usynystarymen bólisti.
«Órt qaýipsizdigi erejelerin saqtaý boıynsha búgingi kúni nusqaýlyqtar júrgizildi, sondaı-aq órt qaýipsizdiginiń bar-joǵy tekserildi. Obektilerde órt sóndirgishter bolýy tıis. Eger bul jazǵy lagerler bolsa, onda shatyrlar nemese kıiz úılerdi ornalastyrǵan kezde toptar arasyndaǵy qashyqtyq 15 m, shatyrlar arasynda 2,5 metr bolýy kerek. Sondaı-aq, jazǵy lagerler ishki jáne syrtqy sý júıesimen jabdyqtalmaǵan bolsa, olardyń jumysyna ruqsat berilmeıdi», - dedi Medeý aýdany Tótenshe jaǵdaılar basqarmasynyń bas mamany, aǵa leıtenant Maǵjan Esen.
