Almatynyń komýnaldyq qyzmetteri qar tazalaý úshin 400 den astam tehnıka birligi men myńdaǵan jumysshylardy jumyldyrdy, dep habarlaıdy almaty-akshamy.kz Komýnaldyq ınfraqurylymdy damytý basqarmasyna silteme jasap.
14-15 qańtarda Almaty qalasynda bıiktigi 4,5 mm jańbyr men silbi qar túrinde jeńil jaýyn-shashyn boldy, 15 qańtarda saǵat 22:00-den bastap qar qatty jaýa bastady. 16 qańtarda saǵat 10:00 - de qalada 8 sm - ge deıin qar jaýdy, Kamenskoe platoda -26 sm, Shymbulaq pen Úlke Almaty ózeninde 46 sm.
Kóktaıǵaqtyń aldyn alý maqsatynda 156 qum taratqyshpen kóktaıǵaqqa qarsy materıaldar (KQM) sebildi. 16 qańtarda saǵat 10:00-degi jaǵdaı boıynsha 3 450 tonna KQM paıdalanyldy.
Túngi kezeńde jol polısıasynyń patrúldik mashınalarynyń erip júrýimen 11 kolonna qar kúredi. Qazirgi ýaqytta jol jıekterindegi qar tazartyldy ári qardy syrtqa shyǵarý uıymdastyryldy.
176 birlik shaǵyn kólemdi jınaý tehnıkasynyń kúshimen trotýarlardy, jalpy paıdalaný oryndaryn, áleýmettik mańyzy bar obektilerge kireberisterdi mehanıkalandyrylǵan jınaý jumystary júrgizilýde. Qoǵamdyq kólik aıaldamalary men jer ústi ótkelderin jumysshylar tazartýda. Qar tazalaýǵa 438 birlik tehnıka men 1 110 jol jumysshysy jumyldyryldy.
Aýdan ákimdikterinde jumys óndirisin baqylaý boıynsha táýlik boıy kezekshilik uıymdastyryldy.