Almatyda estý jáne kórý qabileti buzylǵan adamdarǵa jeti kitaphana qyzmet kórsetedi.
Olardyń aqparatqa yńǵaıly qol jetkizýi úshin zamanaýı jabdyqtarmen qamtamasyz etilgen. Óńirlik komýnıkasıalar qyzmetiniń brıfıńinde atqarylǵan jumystar men damý perspektıvalary týraly «Almaty qalasynyń ortalyqtandyrylǵan kitaphana júıesiniń» dırektory Meıram Bektembaev aıtyp berdi.
«Bul kitaphanalarda mátindi taktıldi formatta shyǵaratyn Braıl dıspleıleri, Braıl basyp shyǵarýǵa arnalǵan prınterler, mátinniń kontrastyn úlkeıtýge jáne ózgertýge arnalǵan qurylǵylar jáne mátindi oqıtyn, ony daýystap oınatatyn jáne aýdıo formatqa aýdaratyn skanerler bar», – dedi ol.
Aýdıokitaptardy tyńdaý yńǵaıly bolý úshin kitaphanalarda dybys sapasy joǵary qulaqqaptar da bar. Sonymen qatar, beıimdelgen baǵdarlamalyq jasaqtamasy bar kompúterler ornatylǵan, bul kórý jáne estý qabileti nashar adamdarǵa aqparatpen tıimdi jumys isteýge kómektesedi.
Estý jáne kórý qabileti buzylǵan adamdar kelesi kitaphanalarǵa bara alady: Jambyl atyndaǵy QJK, «Alatau Creative Hub», Chehov atyndaǵy OQK, Qazaqstan jazýshylarynyń kitaphanasy, sondaı-aq resýrstardy paıdalaný kezinde olardyń yńǵaılylyǵy men jaılylyǵy úshin barlyq jaǵdaılar jasalǵan №4, 14 jáne 45 fılıaldar. Bastama Almaty ákiminiń tapsyrmasy boıynsha mádenı nysandarǵa teń qol jetkizý jáne kedergisiz orta qurý qaǵıdaty sheńberinde iske asyryldy.
Aıta keteıik, bul kitaphanalarda kórý qabileti nashar qyzmetkerler jumys isteıdi jáne oqyrmandarǵa jabdyqty ıgerýge, qajetti resýrstardy izdeýge jáne oqýǵa kómek kórsetedi. Bul jumys oryndaryn qurýǵa jáne qalanyń barlyq turǵyndary úshin mádenıet pen bilimge qol jetimdiliktiń qosymsha múmkindikterin jasaýǵa múmkindik beredi.
Jalpy, qalada ákimdik janynan 30-ǵa jýyq kitaphana jumys isteıdi jáne onyń 95% - y jańǵyrtylǵan. Jyl saıyn Almaty kitaphanalaryna baratyndardyń jalpy sany 3 mıllıonnan asady.