Seriktestik aldaǵy mamyr aıynda tutynýshylardyń túbirtekterine qaıta esepteý júrgizýi qajet.
«Almaty jylý júıeleri» JSHS tutynýshylarǵa artyq eseptelgen 49,4 mln teńgesin qaıtarady, dep habarlaıdy Almaty-akshamy.kz Tabıǵı monopolıalardy retteý komıtetine silteme jasap.
Vedomstvonyń habarlaýynsha, Almaty qalasy boıynsha departamenti syrtqy aýanyń naqty temperatýrasyn eskerip, 2020-2021 jyldardaǵy jylýmen jabdyqtaýdyń qunyn qaıta eseptep, 49,4 mln teńge mólsherinde artyq somany shyǵarǵan.
Alaıda, qalaǵa qyzmet kórsetetin «Almaty jylý júıeleri» JSHS munymen kelispegen, kerisinshe, tutynýshylarǵa shamamen 5 mln teńge kóleminde qosymsha esepteý qajet ekenin habarlady.
«Departament Almaty qalasynyń mamandandyrylǵan aýdanaralyq ekonomıkalyq sotyna «Almaty jylý júıeleri» JSHS-yn óz mindetin oryndaýǵa májbúrleý týraly talap-aryzben júgindi. Bıylǵy 26 qańtardaǵy sot sheshimimen talap-aryz tolyq qanaǵattandyryldy. Sonymen qatar JSHS osy sot sheshimine appelásıa berdi. Biraq Almaty qalalyq soty appelásıany qaraýsyz qaldyrdy. Endi «Almaty jylý júıeleri» kúzgi-qysqy kezeńde temperatýralyq rejımdi saqtamaǵany úshin tutynýshylarǵa jylýmen jabdyqtaýdyń qunyn 49,4 mln teńgege qaıta esepteý týraly sheshimdi oryndaýy qajet», - delingen habarlamada.