Qalamyzdaǵy Qabyldaý úıinde kórnekti jazýshy, mádenıettanýshy Murat Áýezovtiń ómirden ozǵanyna 40 kún tolýyna oraı as berildi.
Jıynǵa elimizdiń ár óńirinen laýazymdy tulǵalar, memleket jáne qoǵam qaıratkerleri, zıaly qaýym ókilderi, jazýshynyń týystary men áriptesteri qatysty, dep habarlaıdy Almaty-akshamy.kz
Qazaq mádenıeti men ádebıetine eńbegi sińgen jazýshynyń qaıtys bolýyna qyryq kún tolýyna oraı ótken qonaqasyda Murat Áýezovtiń adamı qasıetteri men shyǵarmashylyǵy týraly júrekjardy estelikter men qımas sózder aıtyldy.
Atap aıtqanda, jazýshy Dýlat Isabekov, Qazaqstan Jazýshylar odaǵynyń tóraǵasy Mereke Qulkenov, Amantaı qajy Hantemiruly, t.b. jazýshynyń kózin kórgen, qyzmettes bolǵan qoǵam zıalylary Murat Muhtarulynyń ádebı-rýhanı murasymen qatar qaıratkerligin de aıtyp ótti.
Eske alý jıyny QR Parlamenti Senatynyń tóraǵasy Máýlen Áshimbaevtiń hatyn oqýdan bastaldy. Hatta Murat Áýezovtiń Qazaqstan mádenıeti men tarıhyn saqtaý men damytýdaǵy orasan zor róli týraly jazylǵan.
«Murat Áýezov qazaq mádenıetine, rýhanıatyna degdarlyqty, daralyq pen danalyqty alyp kelgen adam. Oqýy da, toqýy da, izdenisi de erekshe boldy. Eń bastysy, eli men jerin, óziniń halqyn súıýdiń jarqyn úlgisin kórsetip ketti. Halqyn bar bolmysymen súıdi. Sebebi, ol uly ákeniń rýhanı meıirimin kórgen adam. Ómir baqı sol meıirimdi óz halqyna jumsady. «Jas tulpar» degen ataqty uıym boldy. Ol zamanda mundaı uıym qurý júıege qarsy shyǵýmen teń edi. Sonyń barlyǵy keshegi Alashtyń rýhymen óskeniniń arqasy. Bılikke de, basqaǵa da eshqashan moıymaǵan adam. Tek qana elge bar bolmysymen, bilimimen eńbek etti. Keıingi 60-jyldardaǵy býyn Murat Áýezov, Tólen Ábdik, t.b. aǵa býynnyń tárbıesin kórdik. Murat Muhtarulynyń salǵan sara joly eshqashan óshpeıdi. Qazaq barda onyń ilimi jasaı beredi», - dedi jazýshy Qalı Sársenbaı.