Eki jeke menshik sýburqaqtyń ıesi olardy Almatynyń komýnaldyq menshigine berýge daıyn, dep habarlaıdy almaty-akshamy.kz
26 maýsymda bastalǵan «Almaty Jazy» qalalyq aksıasy aıasynda megapolıste qalalyq sýburqaqtar tazartylyp, jýylyp, jańartylyp jatyr.
Qazir komýnaldyq menshiktiń balansyndaǵy 66 sýburqaqtyń 60-y retke keltirildi, qalǵan 6-y jańǵyrtylýda. Jeke aýmaqta ornalasqan sýburqaqtar da tazartyldy. Elektr aspaptarynyń, jaryqtandyrýdyń, qondyrmalar men búrikkishterdiń jumysy boıynsha sýburqaq jabdyǵyna tekserý júrgiziledi.
Sonymen qatar, zamanaýı jaıaý júrginshilerge arnalǵan sýburqaqtardy kútip-baptaý jumystary júrgizilýde, onyń 13-i qalanyń komýnaldyq menshiginde. Olar qalpyna keltirilip, fýnksıonaldylyq saqtalyp, estetıka jaqsartylady.
«Aýdandyq ákimdikter men «Eco Almaty» JSHS júrgizetin túsindirý jumystary aıasynda jeke sýburqaqtarǵa tıisti jaǵdaıda turaqty tehnıkalyq qyzmet kórsetý jáne kútip ustaý qajettiligi týraly máseleler belsendi talqylanýda. Jeke sýburqaqtardy komýnaldyq menshikke berý múmkindigine erekshe nazar aýdarylady. Bul olardyń turaqty jumys isteýin jáne qalalyq ortany jaqsartýdy qamtamasyz etýge múmkindik beredi», - dedi «Eco Almaty» JSHS ókili Jánibek Kenjalıev.
Kóbinese jeke aýmaqta ornalasqan sýburqaqtardyń jaǵdaıy máz emes, qaraýsyz qalǵan, jumys istemeıdi nemese ıesinde qarajattyń bolmaýyna baılanysty kúrdeli jóndeýdi qajet etedi. Júrgizilgen túsindirý jumystarynyń nátıjesi boıynsha eki jeke sýburqaqtyń ıesi – «Sháken Aımanov atyndaǵy «Qazaqfılm» ulttyq kınostýdıasy» AQ jáne «Stolıchnyı» TÚK nysandaryn komýnaldyq menshikke berýge daıyn ekendikterin bildirdi.
Almatyda barlyǵy 150 sýburqaq bar, onyń ishinde 66-y komýnaldyq jáne 84-i jeke aýmaqta ornalasqan. «Almaty Jazy» naýqany aıasynda jeke sýburqaqtar qalalyq nysandarmen qatar retke keltiriledi.
6 shildede aıaqtalatyn «Almaty Jazy» naýqany «Taza Qazaqstan» jalpy respýblıkalyq aksıasy aıasynda iske asyrylatyn «Almaty – bizdiń ortaq úıimiz» naýqanynyń jalǵasy bolyp tabylady. Ol qalalyq ınfraqurylym men qoǵamdyq múlikke uqypty qaraýdy qalyptastyrýǵa, sondaı-aq el arasynda ekologıalyq mádenıetti arttyrýǵa baǵyttalǵan.