Almatyda jastar densaýlyǵy ortalyǵynan keńes suraǵandar kóbeıip, áıel adamdardy ártúrli baǵdarlamaǵa tartý jaǵy eselep ósken, dep habarlaıdy aqshamnews.kz
Almatynyń densaýlyq saqtaý Basqarmasynyń ana men bala densaýlyǵyn qorǵaý bóliminiń basshysy Jadyra Ahmetova óńirlik komýnıkasıalar qyzmetinde ótken koferensıasynda osylaı dep habarlady.
«Reprodýktıvti densaýlyqty qorǵaý – Almatynyń áleýmettik saıasatyndaǵy eń mańyzdy sala. 2025 jylǵy birinshi toqsandaǵy málimetke qaraǵanda, otbasyn josparlaý, dárigerge qaralý men jastarmen jumys isteý máselesinde úlken ilgerileý bary baıqaldy», - dedi Jadyra Ahmetova.
Spıkerdiń aqparatyna qaraǵanda, 2025 jyldyń 1 sáýirinde Almaty turǵyndarynyń sany 2 348 096 adamǵa jetken. Bul 2023 jylǵy sol ýaqytpen salystyrǵanda 5,6%, 2024 jylǵymen salystyrǵanda 2,5% kóp. Balalardyń sany 2,5%, jasóspirimder jaǵy 18%-ǵa ósken.
Áıel azamattardy ana atanýǵa daıarlaý jaǵyna da kóp kóńil bólinip jatyr. Bosanýǵa ázirlik jaǵy 2024 jylǵymen salystyrǵanda 19,1%-dan bıyl (jospar – 48%) 50 %-ǵa ósken. Bul áıelderdiń dárigerlik turǵyda saýaty artyp, profılaktıkalyq i-sharalardyń nátıje bere bastaǵanyn kórsetedi.
«Pregravıdarlyq daıyndyqpen qamtýdyń artýy – analar men balalardyń densaýlyǵyna tónetin qaýip-qateri azaıtýǵa septigi tıetin mańyzdy qadam. Kórsetkishtiń 2024 jylmen salystyrǵanda 19,1%-dan 50,8%-ǵa deıin ósýi jańa tásilderdiń sátimen engizilip, medısınalyq qyzmet kórsetýdi uıymdastyrýdyń jaqsaryp, áıelderdiń aqparattaný deńgeıiniń artqanyn dáleldeıdi», - dedi Jadyra Ahmetova.
Sondaı-aq, Almatyda Jastar densaýlyq ortalyqtary (JDO) - jasóspirimder men jastar keshendi medısınalyq-psıhoáleýmettik qoldaý alatyn mamandandyrylǵan mekemelerdiń jumysy da jandanyp jatyr. Qalada qazir osyndaı 14 ortalyq jumys isteıdi. 2025 jyldyń birinshi toqsanynyń qorytyndysy boıynsha ortalyqtarǵa 25 myńnan astam adam júgingen, bul ótken jyldyń osy ýaqytpen salystyrǵanda 66%-ǵa artyq.
Sonymen qatar, kómek alatyndar kóbine psıhologtarǵa (8627 ret), terapevterge (6063), gınekologtar (5745) men ýrologtarǵa (2225) qaralǵan.
Ortalyqtarda qazir 98 maman jumys isteıdi, olardyń 60%-nyń reprodýktıvti jáne psıhıkalyq densaýlyq máseleleri boıynsha arnaýly sertıfıkaty bar. Bul Densaýlyq saqtaý mınıstrligi bekitken standarttarǵa tolyq sáıkesedi.
«Almatyda reprodýktıvti densaýlyqty qorǵaýǵa baǵyttalǵan bastamalar medısınalyq kómekti ǵana emes, sonymen birge bilim berý, aǵartý men psıhoáleýmettik salany da qamtyǵan. Mundaı qadamdar halyq densaýlyǵyn nyǵaıtýǵa, ata-ana mádenıetin qalyptastyryp, qala turǵyndarynyń ómir sapasyn arttyrýǵa yqpal etedi», - dep túıindedi spıker.