Almaty qalasynda "Taza Qazaqstan" jalpyulttyq aksıasy aıasynda ótken aýqymdy senbilikke qalamyzdyń 1500-den astam jastary qatysty.
Olardyń qatarynda qoǵam belsendileri, stýdentter jáne Almatydaǵy barlyq komúnıtı ortalyqtardyń rezıdentteri boldy. Bul is-shara tek qalany tazalaýmen shektelmeı, jastardyń birligin kórsetken mańyzdy shara boldy, dep habarlaıdy aqshamnews.kz.
Almaty jastary ekologıalyq bastamalarǵa belsene qatysyp, qorshaǵan ortany qorǵaýdaǵy rólin kórsetip keledi. Senbilik barysynda olar qalanyń saıabaq aımaqtaryn jınastyryp, jańa aǵashtar otyrǵyzdy. Bul tek ekologıany jaqsartýǵa ǵana emes, sonymen qatar bolashaq úshin jastardyń birigýiniń sımvolyna aınaldy.
«Biz qalamyzdy jasyl ári taza etý úshin birigip jumys istegende, tek qana aǵash otyrǵyzyp nemese tazalyq jumystaryn jasamaımyz. Biz Almaty jastary naqty isterge daıyn ekenin kórsetemiz. Bul — bolashaǵymyzǵa qosqan úles. Árqaısymyz qorshaǵan ortaǵa jaýapkershilikpen qaraýymyz kerek», - dedi óz sózinde komúnıtı ortalyqtarynyń rezıdenti Kemelbekov Muhamedjan.
Árbir qatysýshy týǵan qalaǵa degen qamqorlyq — bul ortaq is ekenin kórsetti. Almaty jastary munymen toqtap qalmaı, aldaǵy ýaqytta da qalany tazartýǵa baǵyttalǵan sharalarǵa qatysatyndary týraly aıtty.
Aıta keteıik, Almatyda «Taza Qazaqstan» respýblıkalyq baǵdarlamasy men «Almaty – bizdiń ortaq úıimiz» qalalyq naýqany aıasynda 18-24 qazan aralyǵynda halyq arasynda ekologıalyq mádenıetti qalyptastyrýǵa, qalany kóriktendirý men kógaldandyrýǵa baǵyttalǵan «Jarqyn kúz» aksıasy ótip jatyr.