Almaty qalasynyń jastary #RepublicDay merekelik chellendjin qabyldap, arnaıy aksıa uıymdastyrdy.
Adam kóp júretin Arbat alańynda patrıottyq ánder shyrqalyp, turǵyndarǵa kók týymyz taratyldy, dep habarlaıdy Almaty-akshamy.kz.
Qydyrýshylarǵa el tarıhyna qatysty túrli vıktorınalyq suraqtar qoıylyp, syılyqtar úlestirildi. Aksıanyń maqsaty – Respýblıka kúni qarsańynda jastar arasynda merekeniń mán-mańyzyn túsindirý jáne jastardyń jetken jetistikterin nasıhattaý deıdi uıymdastyrýshylar.
«Biz chellendjdi qabyldap, qazirgi tańda jalǵastyryp jatyrmyz. Chellendj negizinen áleýmettik jelide joldanǵan bolatyn. Biz tek áleýmettik jelide emes osyndaı patrıottyq aksıalar uıymdastyryp, sonymen qatar ózimizdiń tájirıbemizben bólisip, barynsha turǵyndarymyzdy merekemen quttyqtaý maqsatynda osynda kelip otyrmyz», - deıdi qalalyq jastar saıasatyn damytý memlekettik qory basshysynyń mindetin atqarýshy Baǵdat Anarbaeva.