Almaty qalasy Jumyspen qamtý jáne áleýmettik baǵdarlamalar basqarmasy azamattardyń kásipkerlik bastamasyna qoldaý sharalaryn kórsetip keledi. Bul týraly ÓKQ brıfıńine qatysqan basqarma basshysy Baýyrjan Jaýbasov málimdedi, dep habarlaıdy almaty-akshamy.kz
«Kásipkerlikti damytýdyń 2021-2025 jyldarǵa arnalǵan ulttyq jobasy sheńberinde halyqtyń áleýmettik osal toptary úshin jańa bıznes-ıdeıalardy iske asyrýǵa 400 AEK (1,380 mln.teńge) mólsherinde óteýsiz memlekettik granttar beriledi. Memleket basshysynyń «Ádil memleket. Birtutas ult. Berekeli qoǵam» atta joldaýynda aıtylǵandaı, jastardy jeńildetilgen nesıelermen qamtamasyz etý úshin Agrokredıttik korporasıamen birlesip jastardy jyldyq paıyzy 2,5% - ben shaǵyn nesıelendirý jobasy iske asyrylýda», - dep bólisti B.Jaýbasov.
Mıkrokredıt berý 21 jastan 35 jasqa deıingi jas kásipkerlerdi qoldaýǵa baǵyttalǵan, olardy ótinim berý sátinde dara kásipker retinde tirkeý merzimi 5 jyldan aspaıdy. Baǵdarlamaǵa jumys isteıtin jastardyń ókilderi de qatysa alady.
Nesıeleý sharttary:
- qaryz somasy: 5 mln. teńgege deıin;
- syıaqy mólsherlemesi: jyldyq 2,5% ;
- qaryz merzimi: mal sharýashylyǵyn damytý úshin -7 jylǵa deıin, bıznestiń basqa baǵyttary úshin-5 jylǵa deıin.
Mıkrokredıt merziminiń uzaqtyǵynyń úshten birine deıingi negizgi borysh pen syıaqyny óteý boıynsha jeńildikti kezeń kózdelgen. Kepilmen qamtamasyz etýdiń bolýy mindetti shart bolyp tabylady. Kepil retinde jyljymaly (mamandandyrylǵan tehnıka) jáne jyljymaıtyn múlik qabyldanady. Kepilmen qamtamasyz etý bolmaǵan jaǵdaıda kepil berýshini (ata-analaryn, týystaryn jáne t.b.) tartýǵa bolady.
Ótinim berý úshin Sátbaev kóshesi, 5 mekenjaıy boıynsha «Agrarlyq nesıe korporasıasy» AQ fılıalyna qujattardy tapsyrý qajet (agrocredit.kz). Qazirgi ýaqytta 52 adamnyń ótinimi rásimdeldi.