Almaty qalasy ákimdiginiń bastamasymen jáne Qazaqstan Respýblıkasynyń Fransıadaǵy Elshiliginiń jáne Fransıanyń QR Elshiliginiń qoldaýymen analar men balalardyń densaýlyǵyn qorǵaýǵa, negizinen COVID-19 áseri, reanımasıalyq sharalardy basqarý tetikteri, sondaı-aq neonataldy kútý erejeleri (týylǵannan 28 kúnge deıingi kezeń) arnalǵan onlaın vebınar ótti.
Vebınarǵa Almaty men Parıjdegi jetekshi aýrýhanalardyń akýsher-gınekologtary, neonatologtary, anestezıolog-reanımatologtary qatysty. Perınataldyq kútim salasyndaǵy Fransıanyń jetekshi sheteldik mamandary COVID-19 kezinde júkti áıelder men jańa týylǵan nárestelerdi perınataldy kútý tájirıbelerimen bólisti. Tájirıbe almasý bosandyratyn medısınalyq uıymdardyń praktıkalyq dárigerlerine, medısınalyq uıymdardyń basshylaryna jáne Almaty qalasy qoǵamdyq densaýlyq basqarmasyna júkti áıelder men jańa týǵan nárestelerdi kútýdi, olarǵa sapaly medısınalyq kómek kórsetýdi jaqsartýǵa múmkindik beredi.
Almaty qalasy ákiminiń orynbasary Erjan Babaqumarov óziniń sózinde Fransıanyń Qazaqstandaǵy elshisi Dıde Kanesske jáne fransýz densaýlyq saqtaý uıymy men Assistance Publique-Hôpitaux de Paris (AP-HP) ýnıversıtetiniń aýrýhanalyq ortalyǵy aýrýhanasy dırektorynyń halyqaralyq qatynastar jónindegi orynbasary Alen Berdege birlesken is-sharalar men vebınar uıymdastyrýda qoldaý kórsetkeni úshin alǵys bildirdi. Búginde Almaty úshin júkti áıelder men jańa týǵan nárestelerdi kútý, ásirese, pandemıa kezinde, óte mańyzdy.
Almatyda osy baǵytta ana men sábı óliminiń aldyn alý boıynsha keshendi jospar júzege asyrylýda. Júkti, bosanǵan áıelderge ýaqtyly bilikti kómek kórsetý úshin mobıldi toptar quryldy jáne jumys isteıdi; AMSK deńgeıinde qalanyń kópsalaly toby deńgeıinde qaýip tobyndaǵy júkti áıelder boıynsha konsılıýmdar ótkiziledi.
Port Royal – AP-HP perınataldyq ortalyǵynyń akýsher-gınekology Olıvıa Anselem koronavırýstyq ınfeksıany juqtyrǵannan keıin ár túrli jastaǵy júkti áıelder arasynda júrgizilgen zertteýdiń aldyn-ala nátıjelerimen tanystyrdy. KVI juqtyrǵan júkti áıelder úshin asqynýlardyń arasynda preeklampsıa bolýy múmkin (bul júktiliktiń 20 aptasynan keıin damıtyn jáne joǵary qan qysymymen (140 jáne / nemese 90 mm rt.st.-den joǵary), proteınýrıamen jáne jıi isinýmen sıpattalatyn júktiliktiń asqynýy). Sonymen birge ınfeksıanyń anadan balaǵa juǵý jaǵdaılary týylǵanǵa deıin de, bosanǵannan keıin de, ıaǵnı týylǵannan keıin de tirkelgen.
Sonymen qatar, reanımasıalyq sharalardy basqarý jáne neonataldy kómek kórsetý máseleleri qarastyryldy. Doktor Elı Hadj Port Roıal jáne profesor Valerı Bıran júkti nemese bosanatyn áıeldegi bar aýrýlardy eskere otyryp, emdeýdiń núkteli ádisin atap ótti.
Vebınardyń sońynda qatysýshylar júkti áıelderdiń qaýip tobyna jatatyndyǵyn jáne osy sanattaǵylar, profılaktıkalyq sharalardy kúsheıtýdiń, qajet bolsa psıhologıalyq kómek kórsetýdiń mańyzyn atap ótti. Júkti áıelderdiń densaýlyǵyn saqtaý úshin qaýipsiz orta qajet. Sondyqtan vırýstyń aýa-tamshy jolymen juǵýynyń aldyn alý úshin júkti áıelderdiń týystary men dostaryna, sondaı-aq barlyq almatylyqtarǵa vaksınalaný máselesin keıinge qaldyrmaý usynyldy.
Almaty qalalyq qoǵamdyq densaýlyq basqarmasynyń basshysy Narıman Tabynbaev atap ótkendeı, vaksınalaýmen megapolıs turǵyndarynyń 44%-y qamtylǵan. Barlyq kezeń ishinde 548 myń adamǵa vaksına egildi. Ótken táýlikterde 14 066 adam vaksına aldy. Qalada medısınalyq uıymdarda, mektepterde, mádenı jáne sporttyq mekemelerde, bazarlar men SOSO 212 ekpe pýnkti (250-ge deıin ulǵaıtý múmkindigi bar) jumys isteıdi. 1260 adamnan turatyn 308 ekpe brıgadasy jumyldyrylǵan.