Almaty irgesindegi aýyldardyń turǵyndary gaz qysymynyń azdyǵyna alańdaýly. Bul týraly Almaty-akshamy.kz Inbusiness.kz-ke silteme jasap habarlaıdy.
Qys túspeı, kógildir otynnyń qarqyny bolmasa, qaqaǵan aıazda qaıtpekpiz deıdi aýyl turǵyndary. Soltústiktegi jaǵdaı qaıtalanbaı ma degen qaýip te bar.
Bul Almatynyń irgesinde Jambyl aýdanyna qarasty Myńbaev aýyly. Eldi-mekende sońǵy jyldary jańa úıler jarysa salynyp, halyqtyń sany kún sanap ósýde. Sondyqtan, ár turǵyn úshin gaz máselesi ózekti. Alaıda, qarashanyń sońyndaǵy saryshunaq aıazda gazdyń qarqyny túsip, 100 shaqty úı 2 táýlik boıy salqyn úıde otyrýǵa májbúr bolǵan. Kógildir otynnyń syǵyraıǵan kózine qarap qaldyq deıdi aýyldastar.
"29 kúni gazdyń davlenıesi az boldy. Gaz syǵyraıyp, úıde temperatýra tómen boldy. Myna kórshilerde joq bopty. Mende boldy. Ol ras. Biraq az boldy. Úı salqyndady. Tońdyq", deıdi Sultanbaı Myńbaev aýylynyń turǵyny Beıbit.
Óńirdiń gaz máselesine jaýapty mekemesinen jaǵdaıǵa qatysty pikir berýin suradyq. Aıtýlarynsha, gaz qubyrlarynda jınalatyn kondensattyń kesirinen keıbir jerler bitelip, kógildir otynnyń jyljý jyldamdyǵy báseńdegen. Aýyldaǵy birneshe kóshedegi jylýdyń azaıýyn jaýaptylar osylaı túsindirdi.
"Gazdyń trýbasynda kondensat jınalǵan, somen gaz ótýi qıyn bolǵan. Somen gaz trýbalaryn túgel ashyp, prodývat etkizip, remont jumystaryn jasadyq. Qazir aýyl tynyshtaldy", deıdi "Táýekel-Gaz qubyry" JSHS dırektory Qazbek Ǵabıden.
Qazir eldi-mekenderge kógildir otyn tolyǵymen berilgen. Dese de, bul Almatynyń irgesinde gaz máselesi týyndaǵan jalǵyz aýyl emes. Keshe Panfılov, Gúldala jáne Tuzdybastaý aýyldarynda kógildir otyn bir mezette óship, myńdaǵan úı gazsyz qalǵan. Keıin belgili bolǵandaı, buǵan shirigen aǵashtyń qulaýy sebep bolypty. Óńirdegi gazǵa qatysty problemanyń jıileýi turǵyndardy "soltústiktegi jaǵdaıdyń qaıtalanýy múmkin be" dep alańdatyp otyr. Al, jaýapty mekeme barlyq qubyr tekserilip, pysyqtalǵanyn aıtyp, gazdyń berilýi endi toqtamaıdy dep sendirdi.
Aıta keteıik, Almatynyń irgesindegi 1 mln adam gaz tutynady. Taǵy 30 shaqty eldi-mekenge gaz tartý boıynsha kelissózder júrip jatyr.