İle aýdanynda ınvataksı jetispeıdi. Múgedektigi bar 6500- ge jýyq turǵynǵa nebári eki kólik qyzmet kórsetedi.
Múmkindigi shekteýli jandar kóbine óz qarajatymen taksı jaldaýǵa májbúr, dep habarlaıdy Almaty-akshamy.kz.
İ toptaǵy múgedek Bolat Shoqaıbaev 30 jyldan astam qant dıabetimen aýyrady. Osydan tórt jyl buryn bir aıaǵyn túgel kestirip tastaǵan. Aı saıyn josparly túrde aýdan ortalyǵynda em qabyldaýy tıis. Al sol mejelegen jerge jetý úshin taksı shaqyryp, ony saǵattap kútýge májbúrmin, deıdi.
"Greske bolsyn, protez sentr bolsyn, dıabet ortalyq bolsyn, basqaǵa baramyn sonyń bárine jatý úshin men analızderimdi ótkizýim kerek. Búkil rentgenge túsirýim kerek. Onyń barlyǵy bir kúnde bolmaıdy. Erteńine baryp nátıjemdi alýym kerek. Oǵan taǵy da osyndaı kólik jaldaımyn. Qansha ret osy ózimniń qarap júrgen dárigerime aıtyp edik, biz osy máseleni bilmeımiz dep solaı jaýap berip qaıtarǵan, - deıdi turǵyn Bolat Shoqaıbaev.
Úsh balanyń anasy Indıra Dadeevanyń sút kenjesi Káýsar týa bitti sal aýrýynyń aýyr túrine shaldyqqan. Apta saıyn ońaltý ortalyǵyna baryp em-dom qabyldaıdy. Perzenti arbaǵa tańylǵan soń, qoǵamdyq kólikke otyrý qıyn, - deıdi.
"Qapshaǵaıdyń trassasyna shyǵamyz, áreń jetemiz koláskamen, balamen. Ol jaqtan kúnder bolǵan 8-de shyǵyp, tústen keıin barǵan kezderimiz bolǵan. Balamen, koláskamen 2-3 saǵat turamyz. Árbir adam ala bermeıdi. Sol jaǵynan qınalamyz. Taksıdiń kóbisi almaı ketedi, keıbireýleri bagajym bos emes dep, keıbireýleri tipti toqtamaı ketedi", - deıdi Káýsardyń anasy Indıra Dadeeva.
Qazir İle aýdanynynyń ózinde múgedektigi bar 6500-ge jýyq turǵyn bar. Onyń ishinde, 650 adam birinshi toptaǵy múgedek bolsa, 2500-i ekinshi toptaǵylar. Sondaı-aq, aýdanda 1200-ge jýyq otbasy erekshe bala baǵyp otyr. Osynsha janǵa eki ınvataksıdiń jetpeıtinin ákimdik ókilderi de moıyndap otyr.
"Qazirgi tańda ózderińiz biletindeı áleýmettik qyzmetter portaly bar. Soǵan engizý josparda. Ony endi oblystyq, mınıstrlik deńgeıde sheshiledi dep kútip otyrmyz", - İle aýdandyq Jumyspen qamtý jáne áleýmettik baǵdarlamalar bóliminiń meńgerýshisi Dáýlet Ormanov.
Al múgedektigi bar turǵyndar kútýden ábden sharshadyq deıdi. Sebebi, memleketten alatyn járdemaqysy em-dom, dári-dármeginen artylmaıdy. Eger ınvataksı kóbeıse, qozǵalysymyz jeńilder edi dep úmittenedi. Degenmen, taksı tapshylyǵy qashan sheshileri ázirge belgisiz.