Elimizdegi 45 ıpodromnyń ishindegi eń úlkeni Almaty ıpodromy.
Táýelsizdik alǵaly beri ıpodrom jekemenshikte, dep habarlaıdy Almaty-akshamy.kz
"30 jyl buryn Táýelsizdik alǵan jyldary bizdiń memleket at sportynan bas tartty, sondaı-aq ıpodromdardy da qaraýsyz qaldyrdy. Jylqyny azyq-túlik retinde qarjylandyrýdy qolǵa aldy. Sol sebepti jekemenshiktiń qolyna berdi. Táýelsizdik alǵaly beri ıpodrom jekemenshikte. Keıinnen Almaty ákimdigi satyp alamyz dedi, sosyn almaıtyn boldy. Birese alamyz, birese almaımyz dep birneshe ret oılandy. Ipodromnyń jaǵdaıy jaqsy dep aıta almaımyn. Óıtkeni kúrdeli jóndeý kerek. Bizge ol úshin bıznes-algarıtm kerek. Ipodromdy jóndeý úshin bıznesti jaqsartý kerek. Ókinishke qaraı bizde ondaı aqsha tabatyn múmkindik joq. Biz tek at qoralardy jalǵa berip, sonyń aqshasyna ıpodromdy ustap turmyz", - deıdi Almaty ıpodromy basshysynyń mindetin atqarýshy Iýrıı Kıshenko.
Mamandar "ıpodrom qorasyn qaltalylar ǵana jalǵa alady" degen áńgime qaýeset deıdi.
"Báıge attaryn baǵý ońaı sharýa emes. Onyń jem-shóbi, kútimi bar. Qorasy taza, sporttyq qural-jabdyǵy túgel bolýy kerek, bunymen qosa qanshama maman jumys isteıdi. Másele baılardyń attarynda emes, másele qandaı da bolsyn kiris kózine ıpodromdy ustap turý", - deıdi ıpodrom basshylyǵy.
Al "Báıge federasıasynnyń" músheleri ıpodrom qoldan-qolǵa ótip, toıdaǵy shapannyń kebin kıip jatyr deıdi.
"Almaty ıpodromynda 1930 jyly salynǵan qoralar bar. Báıge ótkende otyratyn oryn joq. Kezinde satyp alǵan jekemenshik azamat bul ıpodromdy súrip tastap, ornyna turǵyn úı salý úshin alǵan. Biraq atbegiler qarsy bolyp, sol kúıi qalyp qoıdy. Bizdiń armanymyz osy Almaty ıpodromyn jergilikti ákimdik satyp alsa deımiz. Shymkentte álemdik standarttaǵy ıpodrom salynǵan dep aıtyp júr. Bul ótirik. Almaty ıpodromy 300 atqa arnalsa, Shymkent ıpodromy 80 atqa ǵana arnalǵan. Ol jerde 20 atqa ǵana qora bar. Báıgege keminde 80 at qatysady. Sonda alystan kelgen attar turatyn qora joq. Alystan barǵan attar qora izdep bosyp ketedi. Ol qoralardyń ózin qaltalylar alyp alǵan", - deıdi "Báıge federasıasy" respýblıkalyq qoǵamdyq birlestiginiń vıse-prezıdenti Jomart Saıbolatov.