Almatynyń ındýstrıaldy aımaǵynda úsh jańa óndiristik kásiporyn jumysyn bastady
Almatynyń ındýstrıaldy aımaǵynda úsh jańa ónerkásiptik kásiporyn paıdalanýǵa berildi. Baspasóz týry barysynda jýrnalıser radıatorlar, kabelder jáne kosmetıkalyq ónimder shyǵaratyn kompanıalardyń qyzmetimen tanysty. Bul óndiristerdi iske qosý Almatynyń ındýstrıalandyrý jáne óndiristik áleýetin damytý baǵdarlamasyn iske asyrýdaǵy kezekti qadam boldy, dep habarlaıdy aqshamnews.kz
«Valtherm» JSHS alúmını jáne bımetal jylytý radıatorlaryn shyǵaratyn zaýytqa salynǵan ınvestısıa kólemi 10 mlrd teńgeden asty. Búgingi tańda zaýytta bes quıý mashınasy ornatylǵan, kún saıyn 10 000-ǵa deıin radıator seksıasy shyǵarylady. Kompanıanyń josparynda 12 quıý mashınasyna deıin keńeıtý jáne óndiris kólemin jylyna 15 mıllıon seksıaǵa deıin ulǵaıtý bar. Joba Almaty ákimdiginiń belsendi qoldaýymen, onyń ishinde ınjenerlik ınfraqurylymdy qosý máseleleri boıynsha iske asyrylýda.
«Biz Qytaıda 20 jyldan astam radıator óndirýmen aınalysyp kelemiz. Qazir barlyq keshendi tájirıbeni Qazaqstanǵa kóshirip, tolyqqandy óndiristi iske qostyq. Biz synyqtardy jınaımyz, qaıta óńdeımiz jáne daıyn ónimderdi — radıatorlardy shyǵaramyz. Qazirgi ýaqytta kúnine 10 000 seksıa shyǵaramyz jáne odan ári keńeıtýdi josparlap otyrmyz», — dedi «Valtherm» JSHS ınvestory Iýen Sı.
Kásiporynda avtomobılge uqsas anaforezdi boıaý tehnologıasy qoldanylady, ol beriktik pen korozıaǵa qarsy qorǵanysty qamtamasyz etedi. Bul tehnologıa radıatorlardyń syrtqy túri men qasıetterin 20 jyl boıy saqtaýǵa múmkindik beredi.
«Bizde Reseıde, Ázirbaıjanda, Ýkraınada klıentter bazasy bar. Bolashaqta Almatyda jıyntyqtaýyshtar óndirisin lokalızasıalaýdy josparlap otyrmyz. Óndiristiń jańa túrlerin – gaz qazandyqtaryn, paneldik radıatorlardy, profılderdi jáne t.b. qurý úshin 3 gektarǵa qosymsha seh salý josparda bar», — dep tolyqtyrdy «Valtherm» JSHS Bas dırektory Saın Musaev.
2024 jylǵy jeltoqsanda ındýstrıalyq aımaqta Kabeldik-ótkizgish ónimderin shyǵarýǵa mamandanǵan «Harmony Cable» JSHS kásiporny jumysyn bastady. Jobaǵa salynǵan ınvestısıa kólemi shamamen 2 mlrd teńgeni qurady. Óndiristi iske qosý nátıjesinde 50 jumys orny quryldy. Qýattylyq aıyna 100 tonnaǵa deıin mys óńdeýge jáne jylyna 8 mlrd teńgeden astam somaǵa 21 600 mln metrge deıin kabelder men symdar shyǵarýǵa múmkindik beredi.
Búgingi tańda kásiporyn qazaqstandyq qurylys kompanıalarymen jáne elektr taýarlaryn jetkizetin bólshek saýda oryndarymen belsendi jumys isteıdi. Ónimniń negizgi kólemi el ishinde satylady, alaıda kompanıa Qyrǵyzstan men Tájikstanǵa eksportty júzege asyrýda jáne Eýropa elderine jetkizilimderdi keńeıtýdi josparlap otyr.
«Biz Balqashtan satyp alynatyn qazaqstandyq mystan kabel shyǵaramyz. Qaıta óńdeý kólemi jylyna 1200 tonnaǵa jetedi. Qazir biz katankadan óz sym óndirý jelisin iske qosyp jatyrmyz, sondaı — aq kabelderge arnalǵan plasıkat — oqshaýlaǵysh materıal óndirý qýatyn keńeıtip jatyrmyz», - dedi «Harmony Cable» JSHS komersıalyq dırektory Mádı Muhanuly.
Búginde Qazaqstannan mys kóbinese Túrkıaǵa, sol jerden Eýropaǵa eksporttalady. Kompanıanyń maqsaty-aralyq tizbekterdi aınalyp ótip, eýropalyq naryqqa shyǵý.
Kosmetıkalyq ónimder men turmystyq hımıa óndirisine mamandanǵan «Telli Ondiris» JSHS zaýyty 2024 jyldyń qańtar aıynan bastap jumys isteıdi. Jobanyń quny 3 mlrd teńgeni qurady, onyń 465 mln teńgesi — «Almaty qarjy» JSHS kredıttik qarjylandyrý. Kásiporyn aýmaǵynda óndiristik jáne qoıma úı-jaılary, sondaı-aq akkredıttelgen zerthana ornalasqan.
Kosmetıkalyq óndiriste 49 jumys orny quryldy. Qýattylyq jylyna 30 mln. birlikke deıin ónim óndirýge múmkindik beredi. Jumystyń alǵashqy 10 aıynda 380 myńnan astam birlik shyǵaryldy, onyń ishinde sýsabyndar, kondısıoner bálzamdary, dýshqa arnalǵan gelder, suıyq sabyndar, losóndar, tonıkter jáne mısellárlyq sý. Ónimder óz brendterimen (Asiya, Telli, Asia Professional), sondaı-aq iri qazaqstandyq satýshylar úshin kelisimshart boıynsha óndiriledi. Zaýyt jańa eksporttyq naryqtarǵa shyǵýǵa múmkindik beretin GMP standartynyń farmasevtıkalyq talaptaryna sáıkes salynǵan.
«Biz ózimizdi kelisimsharttyq óndiris retinde ornalastyramyz-ónimdi klıenttiń óz brendimen shyǵaramyz. Sonymen qatar, biz óz brendterimizdi damytamyz, olardyń quramynda 95% tabıǵı komponentter bar. Biz jergilikti shópterdi qoldanamyz, syǵyndylardy óz ekstraktorymyzda daıyndaımyz jáne jaqyn arada avtorlyq shıkizatqa patentterdi rásimdeýdi josparlap otyrmyz», — dep atap ótti «Telli Ondiris» JSHS dırektorynyń orynbasary Janna Baımaǵambetova.
Baspasóz týry barysynda Almatynyń ındýstrıalyq aımaǵy Respýblıkalyq mańyzy bar jetekshi óndiristik alańdardyń biri bolyp tabylatyny atap ótildi. Onyń aýmaǵynda jalpy somasy 142,1 mlrd. teńgege 41 joba iske qosylyp, 4 430 jumys orny quryldy. İske asyrý satysynda 411,2 mlrd. teńge somasyna 66 joba bar, onda 7 453 jumys orny qurylady.
«Biz turaqty damý dınamıkasyn jáne ınvestorlar tarapynan joǵary qyzyǵýshylyqty baıqap otyrmyz. Indýstrıalyq aımaqta memlekettik qarajat esebinen tolyq ınjenerlik ınfraqurylym, sondaı — aq yńǵaıly kólik logıstıkasy jáne óziniń temirjol stansıasy bar», - dep atap ótti «Almatynyń ındýstrıaldy aımaǵy» JSHS bas mamany Dana Qalyqova.
Aǵymdaǵy jyly Almatynyń ındýstrıaldy aımaǵynda jalpy quny 135,5 mlrd teńge bolatyn 2 662 jumys ornyn qurýmen 11 jobany iske qosý josparlanǵan. Olardyń ishinde alty iri kásiporyn, sonyń ishinde jeńil avtomobılder, bıokormalar, shyny ydystar, armatýralyq torlar jáne rezeńke buıymdar shyǵaratyn zaýyttar, sondaı-aq qalanyń óndiristik sektorynyń odan ári damýyna yqpal etetin bes shaǵyn ónerkásiptik óndiris bar.