Qazaqstan Respýblıkasy Mádenıet jáne aqparat mınıstri Aıda Balaevanyń buıryǵymen Aleksandr Seleznóv atyndaǵy Almaty horeografıalyq ýchılıshesiniń dırektory qyzmetine Aıa Jákenqyzy Qalıeva taǵaıyndaldy, dep habarlaıdy aqshamnews.kz.
Aıa Qalıeva — Qazaqstan Respýblıkasynyń eńbek sińirgen qaıratkeri, QR bilim berý isiniń qurmetti qyzmetkeri, pedagogıka ǵylymdarynyń kandıdaty, iskerlik ákimshilik magıstri (MBA), profesor, birneshe ǵylymı eńbekter men oqý quraldarynyń avtory.
1990 jyly P. I. Chaıkovskıı atyndaǵy mýzykalyq ýchılıshesinde, 1995 jyly Qurmanǵazy atyndaǵy Qazaq ulttyq konservatorıasynda «kompozısıa» mamandyǵy boıynsha bilim alǵan.
Eńbek jolyn mýzykalyq kolejde oqytýshylyq qyzmetten bastaǵan. Keıin Qurmanǵazy atyndaǵy Qazaq ulttyq konservatorıasy men T. Júrgenov atyndaǵy Qazaq ulttyq óner akademıasynda kafedra meńgerýshisi, dekan boldy.
2008 jyly pedagogıka ǵylymdarynyń kandıdaty ǵylymı dárejesin, 2015 jyly Almaty Management University-de iskerlik ákimshilik magıstri (MBA) dárejesin alǵan.
Keıingi jyldary eldegi jetekshi mádenıet jáne bilim berý mekemelerinde basshylyq qyzmetter atqarǵan:
– 2010–2015 jyldary — P. I. Chaıkovskıı atyndaǵy Almaty mýzykalyq kolejiniń dırektory;
– 2015–2018 jyldary — A. Seleznóv atyndaǵy Almaty horeografıalyq ýchılıshesiniń dırektory;
– 2018 jyly — Jambyl atyndaǵy Qazaq memlekettik fılarmonıasynyń dırektory;
– 2018–2021 jyldary — Abaı atyndaǵy Qazaq ulttyq opera jáne balet teatrynyń dırektory.