Bir jasar qyzdyń anasy Almaty qalasyndaǵy №2 qalalyq balalar klınıkalyq aýrýhananyń hırýrgtaryna kindikten bólindige (dymqyl kindik), ishtiń aınalasyndaǵy teriniń titirkenýine, maserasıasyna shaǵymdarmen júgingen, dep habarlaıdy Almaty-akshamy.kz.
Aýrýhananyń baspasóz qyzmetiniń málimetinshe, dıagnozdy tekserý úshin qýyqtyń últradybystyq zertteýi, sıstografıa jasaldy. Zerttep-qaraý nátıjesinde balada ýrahýstyń tolyq emdelmegeni anyqtaldy.
Qýyq-kindik jylankózi, ol kindikten neseptiń turaqty bólinýimen kórindi. Josparly operasıalyq emdeý usynylady. Operasıanyń bul túri MÁMS sheńberinde oryndalady, dep habarlady №2 MQKA baspasóz qyzmeti.
"Ýrahýs-bul nesepaǵar, ol ádette embrıodyq kezeńde ǵana bolady jáne qýyqtyń joǵarǵy bóligin kindikbaýmen baılanystyrady.
Jatyrishilik kezeńniń shamamen 5-7 aıynda onyń bitelýi júredi. Alaıda, belgili bir jaǵdaılarda tútik qabattaspaıdy, nátıjesinde onyń aýytqýlary paıda bolady. Bul jatyrishilik kezeńdegi oblıterasıa prosesiniń buzylýymen baılanysty óte sırek kezdesetin týa bitken patologıa. Hırýrgıadaǵy 30 jyldan astam tájirıbemde men osyndaı 3 jaǵdaıdy ǵana kezdestirdim", - dep túsindirdi №2 MKAD hırýrgıalyq bólimshesiniń meńgerýshisi Marat Qaptaǵaev.
Hırýrg bul patologıamen qabyný asqynýlarynyń aldyn alýǵa múmkindik beretin hırýrgıalyq emdeý kórsetilgenin atap ótti. Bul lokalızasıalanǵan qabyný prosesiniń damýyna, ishtiń aldyńǵy qabyrǵasynyń irińdi qabynýyna (absess), qaıtalanatyn sıstıtke jáne kıstanyń paıda bolýyna ákelýi múmkin. Tolyq fıstýlamen konservatıvtik emdeý tıimsiz.
Quramynda №2 MKKA tájirıbeli hırýrgtary men anestezıologtary M.Qaptaǵaev, E. Mahanov jáne T. Iýsýpovtan turatyn operasıalyq top hırýrgıalyq aralasýdy sátti oryndady – 30 mınýttyń ishinde nesep shyǵarý joly túbegeıli alyp tastaldy jáne balany osy anomalıadan birjola qutqardy.