Almaty qalasynyń týrızm jónindegi Keńesi aıasynda qalanyń kásipkerler palatasy janynan jumys toby quryldy, onyń quramyna Almaty qalasynyń kásipkerler Palatasynyń, Avıasıalyq kólik prokýratýrasynyń, Almaty qalasynyń týrızm basqarmasynyń, Almaty qalasynyń halyqaralyq áýejaıynyń, Almaty qalasynyń halyqaralyq áýejaıynyń JPQ, Túrksib aýdanynyń JPQ, Almaty qalasynyń memlekettik kirister departamentiniń, Almaty qalasy İİD-niń, Qazaqstandyq týrısik qaýymdastyqtyń, Almaty q. TJK óńirlik palatasynyń jáne taǵy basqalarynyń ókilderi endi, dep habarlaıdy almaty-akshamy.kz
Eki apta ishinde jumys toby taksıge tapsyrys berý qyzmetteri (AparuTaxi, Region, Yandex Taxi, Uber, Blue Sky Energy jáne t.b.) usynatyn taksılerdiń qunyn taldady, júrýdiń ortasha baǵasy esepteldi. Jolaýshylardy tasymaldaý tarıfteri otyrǵan jerden baratyn pýnktke deıin qashyqtyqqa ári taksı klasyna baılanysty 1200-den 12000 teńgege deıin ózgeredi. Eń joǵary baǵa áýejaı termınalynan «Shymbulaq» taý shańǵysy kýrortyna deıingi taksıdiń premıým segmentinde kórsetiledi.
Aıta keterligi, bul turaqty emes, biraq jolaýshylar úshin usynylatyn baǵa, taksı qyzmetteriniń quny aýa-raıyn, suranysty jáne basqa derekterdi eskere otyryp ózgerýi múmkin. Usynylǵan baǵalardy eskere otyryp, jolaýshylar baǵa saıasatyn basshylyqqa ala alady.
Týrıser úshin osy usynystardy ázirleýdiń maqsaty – jaýapsyz taksı júrgizýshileriniń zańsyz áreketterin retteý.
Búginde jumys toby qalalyq aımaqtardy jáne usynylatyn baǵalardy qosa alǵanda, resmı taksı operatorlarynyń qyzmetterine tarıfterdi kórsete otyryp, aqparattyq stendter men býkletter ázirledi. Materıaldar qazaq, orys, aǵylshyn jáne qytaı tilderinde jarıalandy. Tolyq qamtý úshin aqparattyq stendter Almaty qalasynyń halyqaralyq áýejaıynyń termınaldarynda ilinedi. Kedendik baqylaý aımaǵynda shetel azamattarynyń pasporttaryna aqparattyq qosymsha paraqtardy taratý kózdelgen. Sondaı-aq, qonaqtar termınaldan shyǵatyn týrısik aqparattyq ortalyqtyń tuǵyrynan tolyq aqparatty ala alady.