Osy jáne bıylǵa arnalǵan damý josparlary jaıynda egjeı-tegjeıli Óńirlik komýnıkasıalar qyzmetiniń brıfıńinde Almaty Alp halyqaralyq áýejaıynyń prezıdenti Alp Er Týnga Ersoı aıtyp berdi, - dep habarlaıdy almaty-akshamy.kz
Spıkerdiń aıtýynsha, ótken jyly Almaty áýejaıy 7 mıllıonnan astam jolaýshyny qabyldap, 64 myńnan astam reıs jasaǵan.
«30 naýryzdan bastap kóktem-jaz maýsymy bastaldy. Bıyl bizge 8 mıllıonnan astam jolaýshy keledi dep boljap otyrmyz. 67 baǵyt boıynsha 70 myńnan astam áýe reısi jáne 94 myń tonna júk reısi kútilýde. Biz sonymen birge jańa baǵyttar boıynsha damýdy da josparlap otyrmyz: Ashhabad, Erevan, Karachı, Kýtaısı, Lahor, Maskat, Kaırol jáne Sıam», - dedi habarlady Almaty halyqaralyq áýejaıynyń prezıdenti.
Qazirgi tańda eń tanymal halyqaralyq baǵyttar: Stambýl, Dýbaı, Antalıa, Máskeý jáne Tashkent reısteri. İshki reısterdiń qatarynda Astana, Shymkent, Aqtaý, Atyraý jáne Aqtóbe bar.
Sondaı-aq spıker áýejaıda jańa termınal qurylysy júrip jatqanyn, jumys 53 paıyzǵa oryndalǵanyn aıtty. Bul jumystar kelesi jyldyń jazyna deıin aıaqtalady dep kútilýde.
Sondaı-aq, áýejaıdaǵy avtoturaq pen pandýstardy qaıta jańǵyrtý máselelerine de erekshe toqtaldy. Áýejaı basshylyǵy pandýstardy jóndeý jumystary osy jazdyń ortasynda aıaqtalatynyn atap ótti. Bul rette olar halyqaralyq reısterge paıdalanylatyn jańa pandýs salýdy josparlap otyr.
«Jańa VIP-termınaldyń qurylysy aıaqtalǵannan keıin onyń ońtústik bóligi avtoturaq úshin paıdalanylatyn bolady. Ekinshi pandýs salynǵannan keıin turaq orny keńeıip, turaq máselesi sheshiledi dep kútemiz», - dedi spıker.
Qazir áýejaı basshylyǵy sıfrlandyrý máselesine kóńil bólýde. Máselen, qurylys júrip jatqan termınalda elektrondy ózin-ózi tirkeý beketteri men sandyq júk júıesin ornatý josparlanýda. Osyǵan uqsas júıeler jóndeý jumystary aıaqtalǵannan keıin qoldanystaǵy termınalǵa da ornatylady.