Qazaqtyń kórnekti jazýshysy Ábdijámil Kámiluly Nurpeıisov senbi kúni ómirden ótti.
Almaty turǵyndary kórnekti qalamger, Qazaqstannyń Eńbek Eri, Halyq jazýshysy, Uly Otan soǵysynyń ardageri Ábdijámil Kárimuly Nurpeıisovti sońǵy saparǵa shyǵaryp saldy, dep habarlaıdy Almaty-akshamy.kz
Ǵasyr jasaǵan qalamgermen qoshtasýǵa kelgen Memlekettik hatshysy Erlan Karın Prezıdent Qasym-Jomart Toqaevtyń kóńil aıtý jedelhatyn oqyp berdi.
«Asa kórnekti qalamger, Qazaqstannyń Eńbek Eri, Halyq jazýshysy, Uly Otan soǵysynyń ardageri Ábdijámil Kárimuly Nurpeıisovtiń dúnıeden ótýine baılanysty kóńil aıtamyn. Ábdijámil Kárimuly surapyl soǵysty bastan keship, elge oralǵan soń, qazaq ádebıetin órkendetýge súbeli úles qosty. Uzaq jylǵy shyǵarmashylyq qyzmeti jemisti boldy. «Qan men ter» trılogıasy, «Sońǵy paryz» dılogıasy sıaqty týyndylary synshylarmen oqyrmandar tarapynan joǵary baǵa aldy. Zaman júgin kótergen romandary álemniń kóptegen tilderine aýdaryldy. Ábdijámil Kárimulynyń jańa belesti baǵyndyrǵan qazaq ádebıetin shetelge tanytýǵa sińirgen eńbegi orasan zor. Ol ult rýhanıatynyń kóshbasshysy boldy. Ábdijámil Nurpeıisov adam janyn tereń túsinetin, túrli taǵdyrdyń beınesin kórkem sýretteı otyryp oqyrmanǵa jetkizgen oıly, keń tynysty jazýshy bolatyn. Ómir boıy qolynan qalamy túsken joq. Qazaq eliniń rýhanı-mádenı salasyn damytý jolynda ólsheýsiz qyzmet atqardy. Ol ult klasıkteriniń jolyn laıyqty jalǵastyrǵan qýatty qalamger.Solaısha, ózi de qazaq ádebıetiniń patrıarhyna aınaldy. Ábdijámil Nurpeıisovtiń sońynda urpaqqa úlgi, ulysqa ıgilik bolatyn shyǵarmalary qaldy. Elge es, syrtqa ses bolǵan jazýshynyń endi ekinshi ómiri bastaldy. Ónegeli ǵumyr keship, sońynda mol mura qaldyrǵan Ábdijámil Kárimulynyń jarqyn beınesi umytylmaıdy. Halqymyz esimin árdaıym ardaq tutady. Marqumnyń ımany salamat, jany jánnatta bolsyn», - delingen kóńil aıtý jedelhatynda.