Almaty qalasynyń Óńirlik komýnıkasıalar qyzmetiniń alańynda haıýanattar baǵynyń damýyna arnalǵan brıfıń ótti. Haıýanattar baǵy dırektory Seıilhan Aqylbekovtyń aıtýynsha, jyrtqysh qustar koleksıasy erekshe maqtanýǵa turarlyq, dep habarlaıdy almaty-akshamy.kz
Sırek kezdesetin qustardyń qatarynda: aqıyq, tazqara, qaraqus, búrkit, ıtelgi, dala qyrany bar. Olardyń barlyǵy derlik Qyzyl kitapqa engizilgen jáne haıýanattar baǵynyń mamandary olardan únemi tól alady.
Sonymen qatar, haıýanattar baǵynyń koleksıasynda úlken qurlyq tórttigi bar: azıalyq pil, begemot, Ońtústik aq múıiztumsyq jáne Ońtústik Afrıka jırafy.
Koleksıadaǵy barlyq janýarlar jeti ekspozısıalyq bólimge bólinedi: «Akvarıým», «Ekzotarıým», «Prımattar», Jyrtqysh qustar, Ekzotıkalyq qustar, Tuıaqtylar, Jyrtqysh sútqorektiler. Haıýanattar baǵynda veterınarlyq bólim, jem-shóp asqanasy, vıvarıı, qurylys alańy, avtogaraj ornalasqan.
2025 jylǵa qaraı janýarlar koleksıasyn 400 túrge ( 4000 bas) deıin ulǵaıtý, al 2030 jylǵa qaraı 500 túrge (7000 bas) jetkizý josparlanýda.
«Bizdiń mindetimiz - janýarlar joıylyp ketken nemese sany azaıyp ketken jerlerge olardy bosatýǵa daıyndaý. Árıne, biz haıýanattar baǵynda týylǵan janýarlardy alyp, jabaıy tabıǵatqa jibere almaımyz. Haıýanattar baǵynda jabaıy janýarlardy reıntrodýksıalaý ortalyǵyn salý jáne janýarlardy jabaıy tabıǵatqa shyǵarý ádisterin ázirleý qajet. Budan ári janýarlardy bosatý Zoologıa ınstıtýtynyń zoolog ǵalymdarynyń, Qazaqstan Respýblıkasy Ekologıa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń ókilderiniń baqylaýymen júzege asyrylady», - dep bólisti S.Aqylbekov.
Atap ótetini, haıýanattar baǵynyń jalpy aýmaǵy - 20,645 gektar