Óńirlik komýnıkasıalar qyzmetiniń alańynda týberkýlezge qarsy kúres aılyǵyna arnalǵan brıfıń ótti. Almaty qalalyq Sanıtarlyq-epıdemıologıalyq baqylaý departamenti basshysynyń orynbasary megapolıstegi jaǵdaı men aldyn alýdyń tıimdi ádisterine toqtaldy, dep habarlaıdy Almaty-akshamy.kz.
«Týberkýlezdiń spesıfıkalyq profılaktıkasynyń basty maqsaty – vaksınasıa. Vaksınasıa jańa týǵan nárestelerge ómirdiń 4-7-shi kúninde júrgiziledi. Birneshe jyldan keıin týberkýlezdiń aldyn alý maqsatynda 7 jastaǵy deni saý balalarǵa (1-synyp oqýshylary) revaksınasıa júrgiziledi. BSJ vaksınasy aýrýdyń damý qaýpin 50%-ǵa tómendetedi. Vaksınasıamen qamtý neǵurlym joǵary bolsa, týberkýlez aýrýy soǵurlym azaıady», - dedi Ásel Qalyqova.
- Vaksınasıa arqyly týberkýlezdiń aldyn alý ınfeksıa deńgeıiniń tómendeýine, týberkýlezdik menıngıtpen syrqattanýshylyq pen ólim-jitimniń kúrt tómendeýine ákeledi, - dep esepteıdi epıdemıolog.
Týberkýlezdiń aldyn alýda eresek turǵyndardy flúorografıalyq tekserýdiń de tıimdiligi zor. Jyl saıynǵy tekserý týberkýlezben aýyratyndardy der kezinde anyqtaýǵa kómektesedi. Týberkýlezdiń aldyn alý júıesindegi flúorografıa aýrýdyń erte kezeńderinde emdeýdi bastaýǵa múmkindik beredi, bul - aýrýmen kúrestegi mańyzdy sharttardyń biri.
«Sonymen qatar týberkýlezdiń áleýmettik profılaktıkasy bar, bul halyqtyń turmys jaǵdaıyn jaqsartý, eńbek jaǵdaıyn ońtaılandyrý, ókpe aýrýlarynyń aldyn alý, tamaqtaný sapasyn jaqsartý, maskúnemdikpen, nashaqorlyqpen kúresý. , temeki shegý jáne t.b.», - dep jalǵastyrdy Á.Qalyqova.
Sanıtarlyq-epıdemıologıalyq departament ókili 2022 jyly Almatyda týberkýlezdiń 482 jańa jaǵdaıy anyqtalǵanyn, syrqattanýshylyq kórsetkishiniń 3%-ǵa tómendeýi baıqalatynyn aıtty.
Ótken jyly týberkýlezben aýyratyndardyń negizgi kórsetkishin jumyssyzdar – 44,2%, zeınetkerler – 18,3%, basqa halyq – 14,1%, bosanǵannan keıingi kezeńdegi áıelder – 1,2% qurady.