Búgin Qazaqstan Respýblıkasynyń Prezıdenti janyndaǵy Ortalyq komýnıkasıalar qyzmetinde Almaty qalasynyń ákimi Erbolat Dosaev Almaty qalasynyń jyl basynan bergi áleýmettik-ekonomıkalyq damýy jaıynda esep berip jatyr.
Bıylǵy jyldyń 5 aıynda megapolıs ekonomıkasy qarqyndy túrde ósti, dep habarlaıdy Almaty-akshamy.kz.
«Qysqa merzimdi ekonomıkalyq ındıkator 122,2%-ke deıin jedeldedi. Jyldyq ınflásıanyń baıaýlaýy aıasynda iskerlik belsendilik ındeksi 58,7 prosenttik tarmaqqa deıin jedeldedi (Abaı oblysynan keıingi II oryn - 58,8). Salystyrmaly túrde aıtqanda, 2022 jyly qysqa merzimdi ekonomıkalyq ındıkator – 106,7%, QR – 103,5%, iskerlik belsendilik ındeksi 51,0», -dedi qala ákimi.
Saýda salasy +27,2%, óńdeý ónerkásibi +24,4%, kólik jáne qoımalaý +16,7% ekonomıka ósiminiń draıverleri boldy. Negizgi kapıtalǵa 484 mlrd. teńge ınvestısıa tartylǵan. Bul rette, jeke ınvestısıalar 2,7%-ke ósken.
«Eńbek naryǵyndaǵy jaǵdaı turaqty. Osy jyldyń basynan beri 29,4 myń jumys orny ashyldy, onyń 60%-ti turaqty (17,6 myń). 2023 jyldyń qorytyndysy boıynsha qala ekonomıkasynyń ósýi 5–5,5% deńgeıinde baǵalanady, Al 2022 jyly jalpy óńirlik ónim – 19 066,6 mlrd. teńge, ıaǵnı ósim – 5,1% teń bolǵan», - dedi E.Dosaev.