Almaty dárigerleri 107 kún boıy náresteniń ómiri úshin kúresti
Búgin Almatynyń perınatologıa jáne balalar kardıohırýrgıasy ortalyǵynan 510 gram salmaqpen ómirge kelgen náreste úıine shyǵaryldy, dep habarlaıdy Almaty-akshamy.kz.
Almaty qalalyq qoǵamdyq densaýlyq saqtaý basqarmasynan habarlaǵandaı, náreste ótken jyly 11 qazanda, anasynyń júktiliginiń 25 aptasynda ómirge kelgen.
Almaty dárigerleri 107 kún boıy náresteniń ómiri úshin kúresken.
«Úıde qaǵanaq sýy kete bastaǵan soń birden jedel járdem shaqyrdym. Olar meni osy ortalyqqa alyp keldi. Munda maǵan barlyq tekserý júrgizildi, sodan keıin tolǵaq bastaldy. Ózim bosandym, balany týǵannan keıin birden reanımasıaǵa alyp ketti», - deıdi balanyń anasy.
Ortalyqtyń anestezıologtary bir jarym aı boıy balanyń ómiri úshin kúresedi.
Dáriger neonatolog-reanımatolog Anel Beıseevanyń aıtýynsha, náreste 30 kún boıy ókpeni jasandy jeldetý apparatynda jatqan jáne qajetti barlyq medısınalyq kómekter júrgizilgen soń ǵana ókpeni ınvazıvti emes jeldetýge aýystyrylǵan.
38-shi kúni bala óz betinshe dem ala bastady.
«Bala anasymen birge «qyryq kún» merekesin osynda atap ótti. Biz «qyrqynan shyǵarý» rásimin ótkizdik, balany jýyndyrdyq, tyrnaǵyn, shashyn aldyq, jalpy osy rásimdegi barlyq is-áreketterdi jasadyq. Árıne, sondaı-aq reanımasıa ujymy ana men balaǵa óz tilekterin bildirdi», - dedi Anel Beıseeva.
Ómiriniń 42-shi kúni bala qarqyndy terapıa palatasyna aýystyryldy.
Bólimsheniń emdeýshi dárigeri Gúlmıra Jeldibaevanyń aıtýynsha, kishkentaı pasıenttiń jaǵdaıy aýyr, biraq turaqty dep baǵalandy.
«Barlyq qajetti terapıadan soń onyń jaǵdaıy turaqtandy. Bala shala týǵandyqtan, retınopatıasy bar ekeni belgili boldy. Oftalmolog kórý qabiletin túzetý operasıasyn jasady, ol sátti ótti. Qazir balanyń jaǵdaıy birqalypty, bala óz betinshe emedi, salmaq qosyp jatyr. Qazirgi salmaǵy - 2710 gram. Búgin ol úıine shyǵarylady. Árıne, bolashaqta balaǵa ambýlatorly túrde mamandar qarap turady», - dedi ol.
Óz kezeginde sábıdiń anasy búkil medısına qyzmetkerlerine alǵysyn aıtty.
«Men osy ortalyqtyń dárigerlerine ulymnyń ómirin saqtap qalǵany úshin shyn júrekten alǵys aıtamyn. Olar bolmasa, ne bolatynyn da bilmeımin. Árıne, meni barlyq jaǵynan, ásirese, moraldyq jaǵynan qoldaǵan medbıkeler men sanıtarlarǵa da úlken rahmet», - dedi balanyń anasy.