Almaty Condé Nast Traveller kózimen: dástúr men zamanaýılyqtyń úılesimi
Tanymal ıtalándyq Condé Nast Traveller jýrnaly Almaty jaıly keń kólemdi materıal jarıalady. Lúchıa Gallıdiń maqalasy men Djakomo Breseldiń fotosýretteri qalany baı mádenıet, tabıǵı sulýlyq jáne zamanaýı dınamıka úılesken erekshe saıahat baǵyty retinde tanystyrady.
Avtorlar Almatyny Shyǵys pen Batys toǵysqan, dástúr men zamanaýı trendter úılesim tapqan oryn retinde sıpattaıdy.
Maqalada Almatynyń tańǵajaıyp tabıǵı kórinisteri erekshe atalyp ótken: İle Alataýynyń asqaq taýlary, Altyn Emel ulttyq parkiniń «án salatyn» qum tóbeleri, sý astyndaǵy ormanymen áıgili Qaıyńdy kóli, Kólsaı kólderi jáne biregeı Sharyn kanony. Tabıǵı murany Panfılov kóshesi, Kók bazar jáne Kók-Tóbe sekildi qalanyń kórikti jerleri tolyqtyrady.
Jýrnal megapolıstiń gastronomıalyq baılyǵyn da erekshe atap ótedi. Dástúrli qazaq taǵamdarynan bastap, jergilikti asqanany neonomadtyq ınterpretasıada usynatyn zamanaýı meıramhanalarǵa deıin kórsetilgen.
Almaty maqalada óz mádenı murasymen, sáýletimen jáne qonaqjaılylyǵymen shabyt izdeıtin ári jańa baǵyt ashýdy jan súıetin týrıser úshin tartylys ortalyǵy retinde beınelengen.
Aıta keteıik, buǵan deıin Almatynyń týrısik tartymdy baǵyt ekeni jaıly CNN Travel — álemdegi eń iri saıahat jáne týrızm týraly aqparat kózderiniń biri aýqymdy maqala jarıalaǵan edi. Bul týyndylar Almatynyń Ortalyq Azıadaǵy eń áleýetti týrısik baǵyttardyń birine aınalyp, tabıǵı sulýlyǵy men mádenı áralýandyǵymen búkil álemnen saıahatshylardy qyzyqtyryp jatqanyn rastaıdy.