«Almaty – bizdiń ortaq úıimiz» jalpyqalalyq naýqanyna qala turǵyndary, ekobelsendiler, estrada, sport juldyzdary, kásipkerler, eriktiler jáne t.b. uzyn-yrǵasy 409 203 adam atsalysty. Olar túrli aksıalarǵa, kvestterge, fleshmobtarǵa qatysty, dep habarlaıdy almaty-akshamy.kz.
Birneshe aksıa halyq arasynda úlken qyzyǵýshylyq týdyrdy. Sonyń biri «Qorshaýyńdy/ oryndyǵyńdy/ besedkańdy boıa» boıynsha qala turǵyndaryna 4 240 l boıaý jáne 590 l eritkish berildi. İs-shara úı mańyndaǵy aýmaqtyń estetıkalyq mazmunyn jáne jeke turǵyn úılerdiń qorshaýyn jaqsartýǵa baǵyttalǵan. Aksıaǵa qatysqysy keletinderge lak-boıaý materıaldary tegin berildi.
2 300 kg qaıta óńdeýge arnalǵan materıaldy turǵyndar syılyq kýponyna aıyrbastaý arqyly qaıtalama shıkizatty (plasıkalyq bótelke, makýlatýra, alúmını banka, móldir shyny) jınaýdy yntalandyrýǵa baǵyttalǵan «Qoqysty tamaqqa aıyrbasta» aksıasy aıasynda jınady. Barlyǵy 11 qabyldaý pýnkti jumyldyryldy, aksıaǵa qatysýshylarǵa 1 867 azyq-túlik kýpony berildi.
Ekologıalyq mádenıetti qalyptastyrý maqsatynda bıyl 3 mamyrda Arbatta tehnıkalyq rejımde plasıkalyq bótelke men sýsynnan alúmını bankalardy qabyldaý boıynsha alǵashqy fandomat ornatyldy. Jınalǵan qaıtalama óńdeletin shıkizatty paıdaly taýarlar óndiretin kásiporyndarǵa qaıta óńdeýge beriledi. Onyń ornyna turǵyndar aqshalaı túrde bonýstar ala alady nemese olardy qaıyrymdylyq maqsatqa bere alady.
Naýqan aıasynda «Taza qasbetter» aksıasy ótip, ǵımarattardyń irgeles aýmaqtary tazalandy, terezeler men vıtrajdar jýyldy, mańdaıshalar men bılbordtar retke keltirildi. Aksıaǵa 1 600-den astam komersıalyq uıym – iri saýda-oıyn-saýyq ortalyqtary, bıznes-ortalyqtar, qonaq úıler, bazarlar, sýpermarketter, dárihanalar, azyq-túlik dúkenderi jáne t.b. qatysty.
Esterińizge sala keteıik, Memleket basshysynyń tapsyrmasymen eldi mekenderdiń aýmaǵyn abattandyrý jáne kógaldandyrý týraly «Taza Qazaqstan» aksıasy aıasynda Almaty qalasy ákimdigi 2024 jylǵy 8 sáýir men 8 mamyr aralyǵynda «Almaty – bizdiń ortaq úıimiz» naýqanyn ótkizdi. Naýqannyń negizgi maqsaty - qalalyq ınfraqurylymǵa uqypty qaraý qundylyǵyn qalyptastyrý, halyq arasynda joǵary azamattyq jaýapkershilik pen ekologıalyq mádenıetti tárbıeleý. «Almaty – bizdiń ortaq úıimiz» naýqany aıasynda ótkizilgen barlyq is-shara uzaq merzimdi ári jalǵasyn tabady.