Almatyda «Taza Qazaqstan» respýblıkalyq baǵdarlamasy aıasynda keń aýqymdy ekologıalyq «Almaty – bizdiń ortaq úıimiz» naýqany bastaldy, dep habarlaıdy aqshamnews.kz
Naýryz aıynyń alǵashqy onkúndigi «Taza kósheler» degen ataýmen ótip jatyr. Bul kezeń jol jabynyn, qoǵamdyq kólik aıaldamalaryn tazalaýǵa, jol belgilerin jýyp-shaıýǵa, qosymsha qoqys jáshikterin ornatýǵa jáne qalanyń negizgi kóshelerin kórkeıtýge arnalǵan.
Naýqan barysynda jumysshylar Soltústik aınalma jolynyń boıyn tazartyp jatyr. Jumysshy Asqar Aldabergenovtiń aıtýynsha, jumys Rysqulov kóshesinen bastalyp, Aınabulaq shaǵyn aýdanyna qaraı jalǵasýda.
«Qyzmetkerler qys kezinde jolǵa sebilgen qum men basqa da qoqystardy jınap jatyr. Bizdiń qolymyzda frontaldy tıegish, samosval jáne shańsorǵysh kólik bar. Jumysshylar negizgi qoqysty jınaǵannan keıin shańsorǵysh usaq qaldyqtardy tazalaıdy. Men osy salada 15 jyldan beri jumys isteımin. Qys bitkesin qar astynda qalǵan qaldyqtardy jınaımyz, al kóktemde saıabaqtar men gúlzarlardy retke keltiremiz. Jyl mezgilderine qaraı tazalyq jumystaryn júıeli túrde júrgizemiz», – deıdi ol.
«Taza kósheler» naýqany aıasynda 180 jumysshy jáne 60 birlik arnaıy tehnıka jumyldyryldy, magıstraldyq kósheler ǵana emes, olarǵa irgeles jatqan saıabaqtar, gúlzarlar, aryq júıeleri tazartylýda. Aýlalarda «Qasbetten qasbetke deıin» qaǵıdaty boıynsha tazalyq jumystary qolǵa alynǵan.
Buǵan qosa, kóriktendirý tólqujaty engizilip jatyr. Aýdan ákimdigi qyzmetkerleri kásipkerler men menshik ıelerin aralap, kóriktendirý tólqujatyna qol qoıý qajettigin túsindirýde. Bul aımaǵyn taza ustaýǵa degen jaýapkershilikti arttyrady.
Joldy shuńqyrly jóndeý jumystary da júrgizilip jatyr. Oıyqty, shuńqyrdy qalpyna keltirý, apatty jaǵdaıdaǵy aryqtar men jıektastardy aýystyrý jumystary bastaldy.
Eske salsaq, 1 naýryzdan 1 sáýirge deıin 4 kezeńge bólingen «Almaty – bizdiń ortaq úıimiz» naýqany ótip jatyr.
- «Taza kósheler» (1-9 naýryz) – aıaldamalar men jol belgilerin jýý, qoqys jáshikterin ornatý, magıstraldy kóshelerdi kórkeıtý.
- «Taza saıabaqtar, skverler jáne taýlar» (10-16 naýryz) – tabıǵı aımaqtarda senbilikter ótkizý, qoqys jınaý sharalary.
- «Taza aýlalar» (17-23 naýryz) – aýlalardy, balalar jáne sport alańdaryn tazalaý, boıaý, kógaldandyrý, «Úzdik aýla/aýla sypyrýshysy/gúlzar» baıqaýlary.
- «Bizdiń qala – bizdiń maqtanyshymyz» (24 naýryz – 1 sáýir) – eskertkishterdi kórkeıtý jáne jappaı aǵash otyrǵyzý.