Qazaqstanda baspanalar ótpeı jatsa da baǵa túspeı tur, dep habarlaıdy aqshamnews.kz
Ulttyq statısıka búrosynyń derekterine sáıkes, 2025 jyldyń maýsymynda elde 33,2 myń turǵyn úı satyp alý-satý mámilesi tirkelgen. Bul mamyr aıymen salystyrǵanda 2,1%-ǵa az. Onyń ishinde páterler negizgi úlesti qurady - 25,4 myń mámile. Jeke turǵyn úılerge 7,8 myń menshik quqyǵynyń aýysýy tirkelgen.
Belsendilik boıynsha kósh bastap turǵan óńirler - Almaty (6628 mámile), Astana (6072) jáne Qaraǵandy oblysy (2392). Eń tómen kórsetkish Ulytaý óńirinde, nebári 282 mámile. Páterler arasynda eń kóp suranysqa bir bólmeli úıler ıe: maýsym aıynda olar 10 myńǵa jýyq ret satylǵan. Jalpy mámilelerdiń 76,4%-y páterlerge tıesili bolǵanymen, dál osy segmentte aıtarlyqtaı tómendeý baıqalǵan, bir aıda 3,1%-ǵa azaıyp, 812 mámile qysqarǵan.
Páter satý boıynsha kóshbasshy - Almaty (24%), odan keıin Astana (23,4%) jáne Qaraǵandy oblysy (7,7%). Al jeke úılerge qyzyǵýshylyq sál de bolsa artqan, bir aıda 1,3%-ǵa ósken. Ásirese, Pavlodar (+20,1%), Jetisý (+19,4%) jáne Aqtóbe (+13,2%) oblystarynda aıtarlyqtaı ósim baıqaldy.
Satyp alýshylardyń belsendiligi tómendegenine qaramastan, turǵyn úı baǵasy ósýin jalǵastyrýda. 2024 jylǵy maýsymmen salystyrǵanda, jańa úılerdiń baǵasy 9,5%-ǵa, qaıtalama naryqtaǵy úıler 6,7%-ǵa, jalǵa berý quny 9,4%-ǵa artqan. Qysqa merzimdi dınamıka boıynsha da ósim bar: maýsymda mamyrǵa qaraǵanda bastapqy naryqtaǵy baǵa 1,1%-ǵa, qaıtalama naryqtaǵysy 0,9%-ǵa, jalǵa alý baǵasy 0,3%-ǵa ósken.