Almatyda 2023 jyldyń 1 maýsymynda jyl saıynǵy «Almaty BALAFEST» balalar festıvaliniń jeńimpazdary men júldegerlerin saltanatty túrde marapattaý rásimi ótti.
Onyń maqsaty – shyǵarmashylyqty iske asyrýdyń túrli baǵyttary boıynsha balalar men jasóspirimderdi damytý jáne qoldaý úshin qalamyzda jasalyp jatqan ıgi sharalardy qamtý, dep habarlaıdy Almaty-akshamy.kz.
Festıválǵa 7 baǵyt boıynsha ótken (mektep aralyq, aýdandyq, qalalyq kezeń) konkýrs jeńimpazdary qatysty:
- «Juldyzdy sát»
- «Boıaýlar qupıasy»
- «Ónerli bala»
- «Kitap – bilim bulaǵy»
- «Jasyl Almaty»
- «OpenAir Sport»
- «Hakaton – IT Universe»
Birinshi mektep kezeńinde 250 000-nan astam oqýshy baq synassa, aýdandyq kezeńge 35 000-ǵa jýyq qatysýshy qatysty. Al 3000-nan astam oqýshy iriktelgen qalalyq kezeńde 1200-den astam bala jeńimpaz atandy. Baıqaýǵa bilim berý uıymdarynyń 1-11 synyp oqýshylary qatysty.
Festıvál aıasynda balalarǵa arnalǵan aýqymdy mádenı-oıyn-saýyq baǵdarlamasymen qalalyq baıqaý jeńimpazdaryn saltanatty marapattaý rásimi ótti. 1200-den astam jeńimpazdar men júldegerler estelik syılyqtarmen marapattaldy (fýtbolka, beısbolka, rúkzak, festıvál logotıpimen termos).
Festıvál baǵdarlamasy tanymdyq oıyndardy, sporttyq estafetalardy, sheberlik synyptar men kórmelerdi, kvestter jáne teatr qoıylymdary sıaqty kóptegen is-sharalardy qamtydy. Ár aımaqta qolóner (kraft) oıyndary, poetıkalyq battldar, plasmassany usaqtaý boıynsha jarys (bótelke qaqpaqtary), beıneleý óneri boıynsha sheberlik synyptary, «Almatynyń bolashaǵy balalardyń kózimen» pleneri, shahmat, sport-stekıng boıynsha jarystar, skeıt, strıtbol boıynsha demonstrasıalyq qoıylymdary, «Robototehnıkaǵa kirispe» sheberlik-synyby, komandalardyń robottardy basqarý jáne onyń múmkindikterin kórsetý jaıly tusaýkeserleri, sándik-qoldanbaly óner sheberhanalary, vıktorınalar, kvestter men teatr qoıylymdary uıymdastyryldy.
Festıvál qala oqýshylaryn, ata-analary men pedagogtaryn biriktirdi jáne árbir bala úshin naqty múmkindikter keńistigine aınalady. Balalar úshin fotoaımaq uıymdastyryldy, onda árkim tanymal sýretshilermen, sportshylarmen, qolónershilermen, ártistermen jáne t. b. sýretke túsýge múmkindik alady.
Basty alańda aǵymdaǵy jyldyń halyqaralyq jáne respýblıkalyq zıatkerlik olımpıadalardyń 60 altyn medal ıegeri marapattaldy. Atalǵan jetistikter arqyly Almaty qalasynyń qurama komandasy 18 jyl qatarynan «QR eń úzdik olımpıada komandasy» atanyp keledi.
Festıvál aıasynda estrada juldyzdary, balalar horeografıalyq ujymdary men "Juldyzdy sát" qalalyq baıqaýy vokalısteriniń qatysýymen merekelik konsert ótti.
«Almaty BALAFEST» festıvali alǵash ret Memleket basshysynyń qatysýymen 2022 jyly Balalar jyly aıasynda ótken bolatyn.