Almaty Azamattyq Alánsy qoǵamdyq dıalogty qalaı nyǵaıtyp, Turaqty damý maqsattaryn qalaı engizýde?
2024 jyly Almaty Azamattyq Alánsy Turaqty damý maqsattary (TDM) boıynsha qoǵamdyq monıtorıń ortalyǵyn iske qosty, dep habarlaıdy aqshamnews.kz.
Ortalyq úkimettik emes uıymdardyń (ÚEU) jobalarynyń tıimdiligin taldaýmen aınalysady. Bul týraly Almaty Azamattyq Alánsynyń tóraǵasy Kaırjan Abdyhalykov Óńirlik komýnıkasıalar qyzmetinde (ÓKQ) ótken baspasóz konferensıasynda aıtty.
Uıymnyń basty maqsaty – memlekettik qurylymdar, ÚEU jáne azamattar arasyndaǵy ózara is-qımyldy damytý arqyly áleýmettik jáne qoǵamdyq máselelerdi birlesip sheshýge yqpal etý. Sonymen qatar, Aláns ekologıa, ınklúzıvti bilim berý jáne qoǵamdyq bastamalardy qoldaý baǵytynda da belsendi jumys júrgizýde.
Aláns jumysyna ártúrli ÚEU men belsendi azamattar qatysady. Qalanyń mańyzdy máselelerin talqylaýǵa turǵyndardy tartý úshin qoǵamdyq tyńdaýlar, dóńgelek ústelder jáne forýmdar uıymdastyrylady.
2023 jyldyń maýsym aıynda Almatyda «Turaqty damý maqsattaryn júzege asyrý» taqyrybynda XIII Azamattyq Forým ótti. Onda aımaqtaǵy turaqty damýǵa qol jetkizýdiń strategıalary men joldary qarastyryldy.
«Kelesi forým mamyr-maýsym aılarynda ótedi dep josparlanýda. Ol Almatydaǵy azamattyq qoǵamnyń ınstıtýsıonaldyq máseleleri men damý perspektıvalaryna arnalmaq. Forým qarsańynda ózekti taqyryptardy talqylaıtyn birqatar dóńgelek ústelder men dıalogtyq kezdesýler ótkizemiz. Bul dıalog alańdaryna ózara syndarly pikir almasý men sheshim izdeýge járdemdesý maqsatynda qurylǵan Úılestirý keńesi men Almaty sarapshylar klýby belsendi qatysady», – dep atap ótti K. Abdyhalykov.
Alánstyń basym baǵyttarynyń biri – ekologıalyq máselelerdi sheshýge járdemdesý, ınklúzıvti bilim berýdi qoldaý jáne áleýmettik osal toptardyń quqyqtaryn qorǵaý. Memleket basshysynyń bastamasymen qolǵa alynǵan «Taza Qazaqstan» baǵdarlamasy aıasynda Aláns ÚEU jáne eriktilermen birlesip, qalany kógaldandyrý jáne aýmaqtardy tazalaý sharalaryn uıymdastyrýda. Bul is-sharalarǵa jastar men belsendi azamattar keńinen tartylýda.
«Almaty Azamattyq Alánsy azamattyq qoǵamdy nyǵaıtýda mańyzdy ról atqarady. Ol memlekettik organdar men halyq arasyndaǵy dıalog alańy retinde jumys isteıdi. Uıym memlekettik qurylymdardyń ashyqtyǵy men eseptiligin arttyrýǵa yqpal etip qana qoımaı, bılik pen qoǵam arasyndaǵy yntymaqtastyqty jaqsartýǵa baǵyttalǵan zańnamalyq bastamalardy ázirleý jáne ilgeriletý isine belsene qatysady», – dedi ÓKQ spıkeri.
2025 jyly TDM júzege asyrylý monıtorıńin jalǵastyrý, memlekettik organdar men azamattyq qoǵam jobalarynyń tıimdiligin baǵalaý josparlanyp otyr. Ásirese, ÚEU ókilderiniń bilimin jetildirýge, volonterlik qozǵalysty damytýǵa jáne qoǵamnyń ártúrli sektorlary arasyndaǵy seriktestikti nyǵaıtýǵa erekshe nazar aýdarylady. Bul jumystar turaqty damýdyń ortaq maqsattaryna qol jetkizýge baǵyttalatyn bolady.