Almatynyń tártip saqshylary qoǵamdyq kólikte urlyq jasaǵan jigitti ustady.
Áýezov aýdandyq PB-nyń polısıa qyzmetkerleriniń dereginshe, qalta urlyǵymen aınalysqan 27 jastaǵy azamat ekeni belgili boldy. Polıseılerdiń aıtýynsha, 1996 jyly týǵan J. esimdi azamat, 118-baǵyttaǵy qoǵamdyq kólikte Saın kóshesi men Raıymbek dańǵylynyń qıylysynda, IPhone telefonyn urlap ketken, nátıjesinde 300 myń teńge materıaldyq shyǵyn keltirgen, dep habarlaıdy Almaty-akshamy.kz Polisia.kz-ke silteme jasap.
«Bizdiń bólimsheniń arnaıy toby men Áýezov aýdandyq PB-nyń qyzmetkerleri júrgizgen jedel izdestirý is-sharalarynyń nátıjesinde kúdikti ustaldy. Atalǵan derek QR QK-niń 188-baby (Urlyq) boıynsha sotqa deıingi tergeýdiń biryńǵaı tizilimine tirkeldi. Kúdikti buryn da osyǵan uqsas qylmystar úshin sotty bolǵan. Qazir kúdiktiniń qalada buryn da jasalǵan osyndaı qylmystarǵa qatysy bar-joǵy anyqtalyyp jatyr. Ustalǵan azamat ýaqytsha ustaý ızolátoryna qamaldy», – dedi Almaty qalalyq PD krımınaldyq polısıa basqarmasynyń bastyǵy Qýatbek Naýatov.
Sonymen qatar, Áýezov aýdandyq polısıasy, bıylǵy jyldyń basynan beri Áýezov aýdanynda 19 qalta urlyǵy tirkelgenin habarlady. Negizinen, urylar qoǵamdyq kólikterdiń ishinde adam kóp jınalǵan ýaqytta júredi.
«Bizdiń bólimshe qyzmetkerleri qalta urylarynyń aldyn alý maqsatynda arnaıy naýqan ótkizip, eskertý plakattaryn ildi jáne arnaıy býkletter taratty. Ádette, qalta urylary negizgi jolaýshylar aǵyny bolatyn tańerteńgi jáne keshki ýaqytta aıaldamalar men qoǵamdyq kólik baǵyttarynda urlyq jasap júredi. Olardyń qurbandary kóbinese áıelder men qart adamdar bolady. Mundaı naýqandy ótkizýdiń mańyzdylyǵyn qala turǵyndary joǵary baǵalap, qoǵamdyq oryndarda qyraǵylyq qajettigin atap ótti», – dedi Áýezov aýdandyq polısıa basqarmasynyń bastyǵy Ulan Ábilqaıyr.