Kólik polısıasy Almaty áýejaıynda qoǵamdyq tártipti qadaǵalaý boıynsha qosymsha sharalar qabyldady
Almaty qalasy áýejaıyndaǵy jelilik polısıa bóliminiń bastyǵy Talǵat Tálipovtyń aıtýynsha, áýejaıdaǵy kólik saqshylary kúsheıtilgen rejımde jumys istep jatyr. Polıseıler qoǵamdyq tártip pen júkterdi saqtaýǵa, sondaı-aq izdestirýde júrgen tulǵalardy anyqtaýǵa basa kóńil bólýde.
«Jeke qurammen jolaýshylarǵa barynsha kómek kórsetýge baǵyttalǵan tıisti nusqamalar júrgizilýde. Avıasıalyq qaýipsizdik qyzmeti ókilderimen birlesip, metal izdeý qurylǵylary arqyly tekseris júrgizilip jatyr. Qazir termınalǵa kirýge tek ushatyn jolaýshylarǵa ruqsat berilgen. Jolaýshylar men olardyń júkteri tekseriledi», - dedi ol.
Osyǵan baılanysty ol jolaýshylardan polısıa qyzmetkerleriniń olardyń qujattaryn tekserý kezindegi áreketterine túsinistikpen qaraýyn suraıdy.
«Tyıym salynǵan zattardy saqtaý, tasymaldaý áreketi ákimshilik jáne qylmystyq jaýapkershilikke ákep soqtyratynyn atap ótkim keledi», – dedi Talǵat Tálipov.
Budan basqa shetel azamattarynyń jáne azamattyǵy joq tulǵalardyń QR kóshi-qon zańnamasy talaptaryn saqtaýyna baqylaý kúsheıtilgen.
«Qazirgi ýaqytta elimizdegi sanıtarlyq-epıdemıologıalyq jaǵdaıdyń jaqsarmaı, kerisinshe, kún saıyn SOVİD-19 dıagnozy rastalǵan tulǵalardyń sany artyp otyrǵanyn qaperge alamyz. Osyǵan qaraı, azamattarǵa áýejaılar men basqa da qoǵamdyq oryndarda qaýipsizdik sharalaryn saqtaýlaryn, jeke qorǵaný quraldaryn qoldanýlaryn suraımyz», – dep qosty ol.