Almaty halyqaralyq áýejaıynyń aýmaǵynda 21 sáýir kúni saǵat 09:00-den 17:00-ge deıin josparly antıterrorlyq oqý-jattyǵý ótkizildi.
Shara áýejaı ǵımaraty ornalasqan Maılın kóshesi, 2 mekenjaıynda boldy, dep habarlaıdy aqshamnews.kz.
Bul oqý-jattyǵý — adamdar kóp shoǵyrlanatyn oryndarda bolýy múmkin terrorlyq áreketterdiń aldyn alý jáne olarǵa dereý áreket etý mehanızmderin jetildirýge baǵyttalǵan keshendi shara. Jattyǵýǵa túrli memlekettik organdardyń qyzmetkerleri qatysty.
Uıymdastyrýshylardyń aıtýynsha, oqý-jattyǵý kezinde áýe reısteri men avtokólik qozǵalysyna shekteý qoıylmady. Degenmen, turǵyndar men jolaýshylardan qaýipsizdik talaptaryn saqtap, quqyq qorǵaý organdary qyzmetkerleriniń zańdy talaptaryn oryndaý suraldy.
Sonymen qatar, azamattardan tek resmı aqparat kózderine súıenip, jalǵan nemese rastalmaǵan málimetter taratpaýǵa shaqyrylady. Bul qoǵamda negizsiz úreı men alańdaýshylyqtyń aldyn alý úshin mańyzdy.
Aıta keteıik, QR «Ákimshilik quqyq buzýshylyq týraly» Kodeksiniń 443-babyna sáıkes, qoǵamdyq tártipti qamtamasyz etýmen aınalysatyn tulǵalardyń zańdy talabyna baǵynbaǵan azamattar ákimshilik jaýapkershilikke tartylady.