Almatyda «Óníp tūr bír qyzyl gúl tasta tírí» atty patrıottyq ís-shara óttí.
Almatynyń Alatau audanynda Jeńístíń 80 jyldyǵy men Keńes Odaǵynyń Batyry Álıya Moldaǵūlovanyń 100 jyldyǵyna arnalǵan taǵylymdy patrıottyq shara óttí. «Ardagerlerdí ardaqtaıyq» jáne «Kítap – AMANAT» jobalary ayasynda ūıymdastyrylǵan būl ís-sharada ūlt jadysyn jańǵyrtyp, ūrpaqtar sabaqtastyǵy erekshe kórínís tapty.
Sharanyń shoqtyǵyn bıíktetken – esímí ańyzǵa aınalǵan batyrmen attas «Amanat» partıyasynyń múshelerí. Álıya esímdí arular batyr ruhyn jalǵap, onyń erlígí men esímíníń búgíngí buyn úshín qanshalyqty mańyzdy ekenín júrekjardy sózdermen jetkízdí. Erlíkke taǵzym retínde olardyń qataryn jańa Álıya esímdí músheler tolyqtyrdy. Saltanatty rásímde partıya qataryna ótken arular elge adal qyzmet etu, patrıottyq qūndylyqtardy ūlyqtau jónínde oılaryn ortaǵa salyp, batyr esímín alyp júru – abyroı ǵana emes, úlken ruhanı jauapkershílík ekenín atap óttí.
– Álıya – bíz úshín jaı ǵana esím emes. Būl – erlík pen adaldyqtyń máńgílík sımvoly. Osyndaı qasıettí esímdí ıelenu – taǵdyrdyń tartuy ǵana emes, tarıhı amanat, – dedí sharaǵa qatysushylar.
Resmı bólímnen keıín qatysushylar Astana alańyndaǵy Álıya Moldaǵūlova men Mánshúk Mámetova eskertkíshíne baryp, erlíkpen qaza tapqan qaharmandardyń ruhyna taǵzym etíp, gúl shoqtaryn qoıdy.
Būl jıyn – batyrlardyń bıík ónegesí men elge degen súıíspenshílíktíń kórkem kórínísí retínde jadymyzda saqtalady. «Amanat» partıyasy ūlttyń ruhanı tūǵyryn nyǵaıtatyn osyndaı sharalardy jalǵastyra bermek.