12 qańtarda Delıden Almatyǵa kelgen reıste medısınalyq kómekti qajet etetin jolaýshy bolǵan. Jolaýshyny qarsy alý úshin áýejaıda arnaıy STCR komandasy daıyn turǵan. Alaıda, qalalyq reanımobıl aldyn ala kelisimsiz áýejaı aýmaǵyna kirip, kómek kórsetý prosesin qıyndatqan. Bul týraly Aqshamnews.kz saıty habarlaıdy.
Áýejaı ókilderiniń aıtýynsha, reanımobıldiń keletindigi týraly aldyn ala habarlanbaǵan. Halyqaralyq erejeler boıynsha mundaı jaǵdaılarda aqparatty keminde 24 saǵat buryn nemese reıs qonýdan 2 saǵat buryn habarlaý qajet.
Jaǵdaı qalaı órbidi:
- Jolaýshynyń háli nasharlaǵan soń, áýejaı qyzmetkerleri ózderiniń jedel járdem qyzmetin shaqyrǵan.
- Alaıda jolaýshyny ertip júrgender áýejaıdyń jedel járdeminen bas tartyp, ony shekara baqylaý aımaǵyna óz kúshterimen jetkizgen.
- Jolaýshy kezeksiz rásimderden ótkizilip, qajetti súıemeldeý kórsetilgen.
Áýejaı ákimshiligi jaǵdaıǵa baılanysty ókinish bildirip, erekshe kútimdi qajet etetin jolaýshylar úshin barlyq jaǵdaı jasaýǵa daıyn ekenin atap ótti. Áýejaıda múmkindigi shekteýli jolaýshylardy súıemeldeý qyzmeti bar, biraq ol úshin aldyn ala habarlaý mańyzdy.