Órt jabyq muz aıdynynyń kishi zalynyń birinshi qabatynda sporttyq ınventardyń janýynan shyqqany málim boldy.
Órt sóndirý bólimsheleri kelgenge deıin ǵımarattaǵy barlyq kelýshiler men qyzmetkerler evakýasıalanǵan.
Gaz-tútinnen qorǵaý qyzmetiniń mamandary órt ornynda shuǵyl áreket etip, qutqarý jumystaryn jedel oryndap shyqty.
Tótenshelikter órtke oranǵan aýmaqtyń aýqymdylyǵyna qaramastan, jalynnyń irgeles bólmelerge taralýyna jol bermegen. Jaǵdaıdy oıyn batýtynyń da bir mezette qatar jana bastaǵany odan ári qıyndatty. Órt sóndirýshilerdiń biliktiligi arqasynda qaýip der kezinde tejelgen.
Almaty qalalyq tótenshe jaǵdaılar departamenti bastyǵynyń mindetin ýaqytsha atqarýshy Baǵdat Shaızada oqıǵa ornynda jasaǵan resmı málimdemesinde: «2025 jyldyń 25 qańtarynda saǵat 15:16-da Almaty qalasyndaǵy Muzdy saraıda 40 sharshy metr aýmaqta oıyn batýtynyń janýy tirkeldi. Jedel júrgizilgen qutqarý jumystarynyń nátıjesinde 400 adam evakýasıalandy, kámeletke tolmaǵan tórt bala qutqaryldy. Órt tolyǵymen sóndirilip, qaýipsizdik qamtamasyz etildi» dep habarlady.
TJD ókilderi qutqarylǵan 4 balanyń esimderin atady. Olar: Serik Sanjar (2013 jylǵy),Serik Áset (2019), Yntymaq Beksultan (2012) jáne Serik Aıbar (2016). Alǵashqy úsh balalardyń jaǵdaıy qanaǵattanarlyq, olar oqıǵa bolǵan jerde dárigerler baqylaýynda. Al Serik Aıbar Qalqamandaǵy 1-qalalyq aýrýhananyń jansaqtaý bólimine jetkizildi.