Almatyda Azıa-Tynyq muhıty aımaǵyn Damytýdyń qarjy ınstıtýttary qaýymdastyǵynyń 46-shy jyl saıynǵy kezdesýi ótip jatyr.
Búginde munda 40 elden 150-den astam halyqaralyq damý ınstıtýttarynyń kóshbasshylary qatysyp otyr. Jıynǵa qatysqan Almaty ákimi bul bizdiń megapolıs úshin mańyzdy oqıǵa dep atap ótti.
«Almaty alǵash ret damý ınstıtýttaryn osyndaı keń aýqymda qabyldaýda. Qazaqstan 2006 jyldan bastap Eýropalyq Damý Bankiniń (EDB) quryltaıshylarynyń biri bolyp tabylady. Bıyl biz Eýropalyq Damý Bankindegi (EDB) úlesimizdi 32,99%-dan 37,29%-ǵa deıin arttyrdyq. Qazirgi ýaqytta biz Eýropalyq Damý Bankimen (EDB) birlesip Almatyda Jylý Elektr Ortalyǵyn modernızasıalaý, Almaty áýejaıynyń jańa halyqaralyq termınalyn jáne Úlken Almaty aınalma avtojolyn (ÚAAAJ) salý sıaqty mańyzdy jobalardy iske asyryp jatyrmyz», - dedi Almaty ákimi Erbolat Dosaev.
Almaty – Qazaqstannyń mádenı, ǵylymı, iskerlik jáne qarjy ortalyǵy. Almaty qalasynyń úlesine Jalpy İshki Ónimniń (JİÓ) besten bir bóligi (2022 jyly 18,5%) jáne Qazaqstan Respýblıkasy búdjetiniń barlyq kiristeriniń tórtten birinen astamy tıesili. Shaǵyn jáne orta bıznes (SHOB) qala ekonomıkasynyń shamamen 60%-yn quraıdy. Munda respýblıkanyń Bas bankteriniń 90%-y shoǵyrlanǵan, 111 halyqaralyq uıymdar men kompanıalar ornalasqan.
«Búginde jahandyq belsendilik vektory Azıaǵa kóshý barysynda Almaty qalasynyń aldynda damýdyń jańa perspektıvalary ashylýda. Ótken jyly biz «Almatynyń 2025 jylǵa deıingi Damý baǵdarlamasyn jáne 2030 jylǵa deıingi orta merzimdi perspektıvalaryn» bekittik. Qalany Damytý baǵdarlamasy ınvestorlar úshin jobalardy irikteý kezinde naqty baǵdar beretin bolady. Ekologıalyq kún tártibi Almaty úshin mańyzdy. Biz ekologıalyq kólik júıesine, turǵyn úı men ǵımarattardyń energıa tıimdiligin arttyrýǵa, komýnaldyq qyzmetterdi jańǵyrtýǵa jáne taǵy basqa salalarǵa ınvestısıalar tartýǵa qyzyǵýshylyq bildirip otyrmyz. Men Sizderdi Almatydaǵy osyndaı jobalarǵa ınvestısıa salýǵa shaqyramyn», - dedi qala basshysy E.Dosaev.