Uly Jeńis kúnin merekeleý qarsańynda Almaty ákimi Erbolat Dosaev Uly Otan soǵysynyń ardagerlerin jeke quttyqtady. Qala basshysy olarǵa erlikteri men batyrlyqtary úshin úlken alǵys bildirip, syılyqtar tabystap, 9 mamyr kúni 28 gvardıashyl-panfılovshylar atyndaǵy saıabaqta ótetin Máńgilik alaýǵa gúl shoqtaryn qoıý rásimine shaqyrdy dep habarlaıdy almaty-akshamy.kz
1942 jyly maıdanǵa 18 jastaǵy áskerı feldsher bolyp shaqyrylǵan ardager Shangereı Janybekovke barǵan kezinde Erbolat Dosaev maıdanger joly jas urpaq úshin úlgi ekenin atap ótti.
«Sizge kórsetken erligińiz úshin bas ıip, taǵzym etemiz. Sizder bizge beıbit aspan syıladyńyzdar. Eger sizdiń urys dalasyndaǵy erlikterińiz bolmasa, qazir ne bolatynyn elestetý qıyn. Sizge uzaq ómir! Men sizdiń 100 jyldyq mereıtoıyńyzǵa eki jyldan keıin mindetti túrde kelemin», – dedi Erbolat Dosaev.
Shangereı Janybekov – Qostanaı oblysynyń týmasy, soǵysqa deıin medısınalyq ýchılıshede oqyǵan. 2-shi Ýkraın jáne Bránsk maıdandaryna qatysty, Poltava, Kırovograd, Kremenchýk, Harkov, Belgorod, Ýkraına, Moldova, Avstrıa, Vengrıa, Rýmynıa jáne Chehoslovakıany jaýlardan tazartýǵa qatysty. Jeńis kúnin Avstrıada qarsy aldy.
Onyń sińirgen eńbegi Oktábr revolúsıasy, II dárejeli Otan soǵysy, Eńbek Qyzyl Tý ordenderimen, «Erligi úshin» eki medalmen, Qazaq KSR Joǵarǵy Keńesiniń Qurmet gramotalarymen jáne basqa da laıyqty nagradalarmen atap ótildi. 2017 jyly Shangereı Janybekovke Almaty qalasynyń Qurmetti azamaty ataǵy berildi.
Erbolat Dosaev sondaı-aq Uly Otan soǵysyna qatysýshy Qaıyrly Jonqabaevpen kezdesti. Ol 1941 jyldyń qazan aıynda áskerge shaqyrylyp, Máskeý túbindegi aty ańyzǵa aınalǵan 8-shi gvardıalyq Panfılov dıvızıasynyń quramynda soǵystyń sońyna deıin boldy.
Qaıyrly Jonqabaev jeńisti Kenıgsberg qalasynyń shetinde qarsy aldy jáne soǵystan keıin Kalınıno qalasynyń komendatýrasynda qyzmet etti.
«Ókinishke oraı, ardagerlerdiń ishinde búgingi beıbit kúnge jetken jalǵyz panfılovshy ózińizsiz. Sizde kóptegen marapattar bar – Qyzyl Juldyz ordeni, ekinshi dárejeli Otan soǵysy, Halyqtar Dostyǵy ordeni, «Erligi úshin» medali jáne t.b. biraq biz úshin Siz, eń aldymen, bizdiń tynysh balalyq shaǵymyz, balalarymyzdyń beıbit jáne baqytty ómiri úshin biz Sizge máńgi qaryzdarmyz», – dedi kezdesý barysynda Erbolat Dosaev.
Áńgime barysynda Almaty basshysy qalada barlyǵy 75 Uly Otan soǵysynyń ardageri qalǵanyn jáne olardyń barlyǵyna laıyqty kóńil bólinip, qoldaýǵa ıe bolǵanyn atar ótti.
«Biz barlyq ardagerlerdi aralap, árqaısysyn kele jatqan 9 mamyr merekesimen quttyqtaý úshin orynbasarlarymmen, aýdan ákimderimen, basqarma basshylarymen birge bólistik. Aldyńǵy eki jylda koronavırýs jaǵdaıynda sanıtarlyq-epıdemıologıalyq shekteýlerge baılanysty sizge barýǵa jáne merekelik is-sharalar ótkizýge múmkindik bolmady. Bıyl bári oıdaǵydaı bolady-konsert pen qurmet kórsetiledi. Sizderdi 9 mamyrda gúl shoqtaryn qoıýǵa shaqyramyn. Biz kólikpen, basqa da barlyq qajettiliktermen tolyq qamtamasyz etemiz», – dedi Erbolat Dosaev ardagermen áńgimelesý barysynda.
Qala basshysy 1943 jyldan bastap armıa qatarynda qyzmet etken Uly Otan soǵysynyń taǵy bir ardageri – Aleksandr Jýravlevti quttyqtady.
Ol 1943 jyldan bastap Karel maıdanynda soǵysyp, 1944 jyldyń shildesinen bastap 1-shi Ýkraın maıdanyna ótti, sodan keıin Polshada, Germanıada jáne Pragada jaýmen shaıqasty. Jeńisti 1945 jyly 9 mamyrda Pragada qarsy aldy. Gvardıalyq artılerıalyq brıgadada kapıtan ataǵynda barlaýshy bolyp qyzmet etti, brıgada starshınasy boldy. Soǵystan keıin 1950 jyldyń mamyr aıyna deıin áskerde qyzmetin jalǵastyrdy.
Áskerı erligi úshin Aleksandr Jýravlev İ dárejeli Otan soǵysy ordenin, «Germanıany jeńgeni úshin», «Varshava úshin», «Berlın úshin» jáne t.b. medaldardy ıelendi.
«Sizderdi shyn júrekten merekemen quttyqtaımyn. Úlken alǵys sizge. Men árqashan balalaryma qazir bar jaqsylyqtyń bári jaı ǵana paıda bolmaǵanyn aıtamyn. Bári basqasha bolýy múmkin edi. Bizdiń beıbit aspan úshin mıllıondaǵan adam qaıtys boldy. Árıne, bul taqyryp tarıhqa birtindep enýde. Jas býyn qashanda osylaı bolǵan dep oılaıdy. Biraq sizderdiń, bizdiń batyrlarymyzdyń kózi tiri turǵanda jasaǵan janqıarlyq erlikterińiz eshqashan umytylmaıdy, júregimizde saqtalady. Sizderdi 9 mamyrda merekede kútemiz, birge atap ótemiz», – dedi ákim Jýravlevter úıinde jyly qabyldaý kezinde.
Ardagerlermen kezdesý maıdangerlerdiń týystary men jaqyndarynyń qatysýymen jyly atmosferada - jyly kóńilde, jaıly úı jaǵdaıynda ótti. Kezdesý barysynda soǵysqa qatysýshylar ótken týraly estelikterimen, ázil áńgimelerimen jáne elimizge beıbitshilik pen kelisimniń izgi tilekterimen bólisti.