Qala basshysy ardagerlerge erligi úshin rızashylyq bildirip, syılyqtar tabys etti.
Jeńis Kúni qarsańynda Almaty ákimi Erbolat Dosaev Uly Otan soǵysynyń ardagerlerine baryp, olardy kele jatqan merekemen quttyqtady, dep habarlaıdy Almaty-akshamy.kz.
Qala basshysy ardagerlerge erligi úshin rızashylyq bildirip, syılyqtar tabys etti jáne 9 mamyrda 28 gvardıashy-panfılovshylar atyndaǵy saıabaqta ótetin Máńgilik alaýǵa gúl qoıý rásimine shaqyrdy.
Erbolat Dosaev 16 jasynda soǵysqa attanǵan Bısenǵalı Jubanıazovqa arnaıy bardy. 1942 jyly Rıga jaıaý ásker ýchılıshesin bitirgennen keıin jas óren 40-shy armıa brıgadasynyń quramyna kirgen. Smolensk mańynda alǵashqy urysqa kirisken. Batyldyǵy men erligi úshin orden-medaldarmen marapattaldy. Keskilesken urystyń birinde qatty jaraqattanyp, jeńisti Soltústik maıdanda qarsy alypty.
Qala ákimi Bısenǵalı Aıtjanulynyń ómir joly erliktiń, órliktiń jáne áskerı boryshqa adaldyqtyń jarqyn úlgisi ekenin atap ótti.
«Sizdi kórgenime óte qýanyshtymyn! Byltyr jeńis kúnin toılaý kezinde aıtqan sózińiz, aqylyńyz jáne jyly tilegińiz áli esimde. Taǵy bir jyl ótti, sizdi osy mereıli merekede denińiz saý, tatý-tátti otbasynyń arasynda jaqsy kóńil-kúıde otyrǵanyńyzdy kórý úlken baqyt. Menińshe, sizdiń balalaryńyz ben nemerelerińiz baqytty jandar, óıtkeni sizdeı Uly Otan soǵysyndaǵy jeńis, ortaq bolashaǵymyz úshin qajyrly eńbek syndy talaı ıgi is tyndyrǵan aqsaqal, áýlet basshysynan bata alyp otyr. 2 jyldan keıin sizderdiń mereıtoılaryńyz bolady, sizdiń 100 jyldyǵyńyzda taǵy da kezdesip, toılaýdy jazsyn», - dedi kezdesý barysynda Almaty ákimi Erbolat Dosaev.
Ardager óz kezeginde uzaq ómir súrýdiń qupıasymen bólisti.
«Qazir jasym 98-de. Densaýlyq – bul eń áýeli tártip. Men erte turamyn, jattyǵý jasaımyn, tósek jınaımyn. Bárin ózim jasaımyn, tek ózime senýge tyrysamyn. Bul sergek júrýge kómektesedi. Meniń oıymsha, ómirde árqashan táýelsiz bolý kerek. Muny bizdiń bolashaq urpaǵymyzǵa da tileımin», - dep keńes berdi Bısenǵalı Jubanıazov.
Vladımır Belozerovtyń balalyq shaǵy erte aıaqtaldy. 18 jasynda maıdanǵa attandy. Vladımır Dmıtrıevıch Ýkraınany azat etti – Harkov pen Kremenchýgtaǵy shaıqastarǵa qatysyp, Dneprdi kesip ótti. Shaıqastyń birinde ol qatty jaraqat alyp, maıdan dalasyna qaıtyp oralmady. Vladımır Belozerov erligi úshin Qyzyl juldyz jáne Otan soǵysy ordenderimen marapattaldy. Beıbit ómirde de marapattan kende bolmady: Vladımır Belozerov eńbektegi joǵary kórsetkishteri úshin Qazaqstandaǵy úzdik marapat Lenın ordenin aldy. Ol 28 jyl Almaty qurylys materıaldary kombınatynda jumys istedi. Vladımır Belozerovpen ómirdiń ashysyn da, tushysyn da áıeli Tamara Ivanovna Belova ekeýi birge tatty. Búginde, uzaq jyldan keıin ekeýi bir ústelde qol ustasyp otyrady. Vladımır Dmıtrıevıch áıelinsiz ómirdi elestete almaıtynyn aıtady: birlesip qana barlyq qıyndyqty eńseredi. Mahabbat ómir súrýge, kúresýge, bolashaq qurýǵa kúsh berdi. Almaty ákimi Erbolat Dosaev erli-zaıyptylardy shyn júrekten quttyqtap, uzaq ǵumyr men zor densaýlyq tiledi.
«Biz sizdiń aldyńyzda qaryzdarmyz, qonaqjaılylyq, jyly qarym-qatynas, energıańyz jáne ómirge degen súıispenshiligińiz úshin alǵys aıtamyn. Munyń bári mahabbattan bastalady: jubaıyńyz ekeýińiz bizge úlgisisizder. Men sizdiń ómirińizde bári jaqsy bolǵanyn qalaımyn. Qoldaryńyz ajyramasyn, baqytty bolyńyz. Biz óz kezeginde qalamyzdyń gúldenýi úshin bar kúshimizdi salamyz», - dedi Almaty ákimi.
Vladımır Dmıtrıevıch ta barlyq qazaqstandyqty kele jatqan Jeńis kúnimen quttyqtady.
«Byltyr jáne osy jyly uıymdastyrǵan mereke úshin rahmet: biz erteń mindetti túrde qýana baramyz! Barsha qazaqstandyqqa jaqsylyq, densaýlyq jáne uzaq ǵumyr tileımin, barlyǵymyz Jeńistiń 78 jylyn emes, 80 jyl jáne odan da kóp ýaqytty qarsy ala bereıik», - dedi ardager.
Zulharnaı Seıitovtyń maıdandaǵy tarıhy 1942 jyly Sverdlovsk qalasynda áskerı isti oqyp, Lenıngradqa jiberilgen kezde bastaldy. Zulharnaı Seıitov kóp oqydy: aldymen jaý tankterin joıý úshin arnaıy daıyndyqtan ótti, keıinirek mınany zalalsyzdandyrý úshin saperdi oqydy. Ol Stalıngrad shaıqasyna, Belorýssıa men Polshanyń azat etýge, Berlındi shabýyldaýǵa qatysqan. Onyń kóptegen jaýyngerlik marapaty bar, sonyń biri Qyzyl Juldyz ordeni jáne «Erligi úshin» medali. 1945 jyly 2 mamyrda qazaqstandyq batyr Reıhstag qabyrǵasynda óziniń tegin jazdy. Oqýǵa degen súıispenshilik soǵystan keıingi ómirde de jalǵasyn tapty. Zulharnaı Seıitov Omby aýylsharýashylyq ınstıtýtyn bitirip, bıologıa ǵylymdarynyń doktory boldy. 150-den astam ǵylymı eńbek pen monografıa, 14 patent jáne 8 avtorlyq kýáligi – ǵylymǵa qosqan ólsheýsiz úles. Zulharnaı Seıitovtyń kóptegen ázirlemesi men jańalyqtary áli kúnge deıin medısına men tamaq ónerkásibinde qoldanylady.
Ardager maıdannan jáne beıbit ómirden alǵan estelikterin Erbolat Dosaevpen qýana bólisti. Almaty ákimi óz kezeginde Zulharnaı Seıitovti kele jatqan uly merekemen quttyqtady:
«Adamzat tarıhyndaǵy eń qıyn da, qatygez soǵysta sizder, ákelerimiz ben atalarymyz naǵyz batyrlyq kórsetip, Uly Jeńiske úles qostyńyzdar. Siz búkil ǵasyrdyń kýágerisiz. Biz sizderge ashyq aspan men beıbit ómir úshin alǵys aıtamyz. Bul eń aldymen, sizderdiń eńbekterińiz. Biz úshin 9 mamyr – Uly mereke. Jas urpaq sizdiń erligińizdi umytpaıdy», - dedi Erbolat Dosaev ardagermen jáne onyń otbasy múshelerimen áńgime barysynda.
«Bizdi umytpaǵanyńyz úshin rahmet. Qart adam úshin mundaı kezdesý – mereke. Batamdy bereıin. Qazaqstanymyz órkendep, balalarymyz beıbitshilik pen kelisimde ómir súrsin. Barlyq qazaqstandyqqa densaýlyq pen amandyq tileımin», - dedi Zulharnaı Seıitov.
Buǵan qosa, UOS ardagerleriniń úıine qala ákiminiń orynbasarlary, aýdan ákimderi, basqarma basshylary da at basyn burdy. Kezdesý barysynda maıdangerlerdi merekesimen quttyqtap, olarǵa zor densaýlyq pen baqyt tiledi, Jeńis kúnin 28 gvardıashy-panfılovshylar saıabaǵynda atap ótýge shaqyrdy.