Almaty ákimi Erbolat Dosaevtyń halyqpen kezekti kezdesýi Túrksib aýdanynda ótti. Qala basshysy aýdannyń damýy jáne turǵyndardan kelip túsken usynystar boıynsha atqarylǵan jumystar týraly aıtty. Kezdesýge 350-den astam adam keldi, dep habarlaıdy Almaty-akshamy.kz.
Aýdandaǵy komýnaldyq ınfraqurylymdy jańǵyrtý problemasy ózekti másele bolyp qalýda. "Shýaqty", "Jas Qanat", "Tómengi besjyldyq" shaǵynaýdandary men Zakarpatskaıa kóshesinde 138,2 km jeli qurylysy júrgizilýde. Búginde 62,2 km tartyldy, jyl sońyna deıin 22,7 km sý jáne káriz qubyrlaryn júrgizý aıaqtalady.
Turǵyndardy úzdiksiz elektr qýatymen qamtamasyz etý úshin aýdanda 4,2 km jeli qaıta quryldy. Jyl sońyna deıin 11 km elektr berý jelisin jańǵyrtýdy aıaqtaý jáne 100 kósheni syrtqy jaryqtandyrý josparlanǵan. Sondaı-aq, 2023 jyldyń ekinshi toqsanynda paıdalanýǵa berilýi tıis "Tuzdybastaý" qosalqy stansıasyn salý boıynsha jumystar júrgizilýde. Joldardyń paıdalaný sıpattamalaryn jaqsartý úshin jalpy uzyndyǵy 10,3 km 18 kóshede ortasha jóndeý aıaqtaldy. Qazan aıynyń sońyna deıin aýdannyń taǵy 82 kóshesinde, sondaı-aq Qulja traktisi - Buqtyrma kóshesindegi jolaıryǵynyń qurylysyn aıaqtaý josparlanýda.
Qala ákimi atap ótkendeı, aýdanda jaýyn-shashyn kezinde sý basý máselesi ózekti bolyp qalýda. Osy problemany sheshý úshin aǵymdaǵy jyly 11 ýchaskede (3,8 km.) aryqtardy salý jáne rekonstrýksıalaý jáne Almaty-1 kolektoryn qalpyna keltirý boıynsha jobalar iske asyrylýda, ol Zorge kóshesindegi jańbyr sýyn taratýdy qamtamasyz etedi.
Oqýshy oryndarynyń tapshylyǵy máselesin sheshý úshin aýdanda 1350 oryndyq 3 mektepti – №59, №195 jáne №198 keńeıtý boıynsha jumystar júrgizilýde. №59 mektep-gımnazıasynyń aýmaǵynda qazan aıynda 300 oqýshyǵa arnalǵan jańa ǵımarat pen qosymsha qurylys salynady. Bul rette eski ǵımarattyń bir bóligi buzylady. №195 jáne №198 mektepter boıynsha 1050 oryndy qosalqy nysandar qurylysynyń JSQ ázirlenýde. JSQ-ny 2023 jylǵy shildede aıaqtaý josparlanýda. Sondaı-aq jyl sońyna deıin "Qaırat" shaǵynaýdanyn 1500 oryndyq mektepti paıdalanýǵa berý josparlanýda.
Mektepke deıingi uıymdardaǵy oryn tapshylyǵyn qysqartý maqsatynda 730 oryndyq 3 memlekettik balabaqsha salý josparlanýda. "Qaırat" shaǵynaýdanynda 260 oryndyq balabaqsha qurylysyn 2023 jyly aıaqtaý josparlanǵan.
Medısınalyq qyzmet kórsetýdiń qadamdyq qoljetimdiligin qamtamasyz etý úshin Túrksib aýdanynda 1 emhana men 3 otbasylyq-dárigerlik ambýlatorıa (ODA) salý josparlanǵan. 4-shi toqsanda “Nurshashqan" shaǵynaýdanynda 100 kelýshige, Aıbasov kóshesi boıyna 200 kelýshige arnalǵan (ODA) otbasylyq- dárigerlik ambýlatorıanyń qurylysy bastalady. Jyl sońyna deıin "Qaırat" shaǵynaýdanynda emhana salýǵa (340 kelýshige arnalǵan) JSQ ázirlenedi. Qurylys-montaj jumystaryn 2023 jyly bastaý josparlanyp otyr. «Álmerek» shaǵynaýdanynda 200 kelýshige arnalǵan ambýlatorıa salý úshin jer ýchaskesin satyp alý rásimderi júrgizilýde, 2023 jyly JSQ ázirlenetin bolady.
Aýdanda jyl sońyna deıin «Jas qanat» shaǵynaýdanynda baseıni bar dene shynyqtyrý-saýyqtyrý kesheniniń (DSK) qurylysy aıaqtalady. Sondaı-aq, jeltoqsan aıynda Maılın kóshesi boıyna salynatyn DSK jáne Ogarev kóshesi boıyndaǵy damý jáne shyǵarmashylyq ortalyǵynyń JSQ ázirleý aıaqtalady.
Sondaı-aq, qala ákimi Erbolat Dosaev "Halyqtyń búdjetke qatysýy" baǵdarlamasyn júzege asyrýdyń barysy týraly habardar etti. Aǵymdaǵy jyly aýdanda 800 mln teńgege 28 joba qolǵa alynǵan. Búginde 11 joba iske qosyldy, qalǵandary osy jyldyń qazan aıynyń sońyna deıin aıaqtalady.
Almaty ákimimen kezdesý barysynda turǵyndar joldardy, káriz jáne elektr jelilerin jóndeý, abattandyrý jáne t.b. máselelerdi kóterdi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýlerdiń jańa formatyna sáıkes, jyl sońyna deıin Erbolat Dosaev halyqpen 24 kezdesý ótkizedi – toqsanyna 8 aýdannyń turǵyndarymen bir-bir kezdesý.