Almaty qalasynyń ákimi Darhan Satybaldy jumys sapary barysynda ınjenerlik jelilerdiń qurylysy men qaıta jańǵyrtý júrgizilip jatqan komýnaldyq ınfraqurylym nysandaryn aralady.
«Dostyq» shaǵynaýdanynda Áýezov aýdany ákimdiginiń tapsyrysy boıynsha aýyzsý jáne káriz jelilerin salý jobasy júzege asyrylyp jatyr. Joba aıasynda uzyndyǵy 15,7 shaqyrym ınjenerlik jeli júrgiziledi, onyń ishinde 1,1 shaqyrymy – sý qubyry, 14,6 shaqyrymy – káriz júıesi. Nátıjesinde 800 úı, shamamen 3,5 myń turǵyn qamtylady. Qazirgi tańda 1 shaqyrym sý qubyry men 8,5 shaqyrym káriz jelisi tartyldy, bul jalpy jumystyń 75 paıyzyn quraıdy.
«Jumysty qysqa merzimde, qysty kútpeı aıaqtaý qajet. Bul másele meniń kúndelikti baqylaýymda. Eń bastysy – qaýipsizdik, sapa jáne ýaqyt. Turǵyndarǵa da barlyq málimet túsindirilip otyrýy kerek. Kelisimshart kelesi jyldyń aqpanyna deıin jasalǵanymen, biz merzimdi eki ese qysqartyp, qazan aıynyń sońyna deıin aıaqtaýdy tapsyrdyq», – dedi ákim.
Almaly aýdanynda qala ákimi Jambyl – Jarokov – Aımanov – Qabanbaı batyr kósheleriniń aýmaǵyndaǵy jylý jelilerin qaıta jańǵyrtý jumystarymen tanysty. Jeliler apatty jaǵdaıda dep tanylǵan, tozý deńgeıi – 100%. Jobanyń tapsyrys berýshisi – «Almaty jylý jelileri» JSHS. Qaıta jańǵyrtylatyn jeliniń uzyndyǵy – 583 metr. Jumystardy aıaqtaý 2025 jyldyń qyrkúıegine josparlanǵan. Qazirgi tańda jumystar sońǵy kezeńde. Ákim jumystar aıaqtalǵannan keıin barlyq qazylǵan aýmaqty qalpyna keltirip, sapaly abattandyrý júrgizý qajettigin atap ótti.
Bostandyq aýdanynda Darhan Satybaldy Myńbaev kóshesinde (Jarokov kóshesinen Túrkebaev kóshesine deıin) júrgizilip jatqan sý qubyrynyń rekonstrýksıasymen tanysty. Jobany «Almaty Sý» SHJQ MKK júzege asyrýda.
Birinshi kezeńde uzyndyǵy 1 083 metr bolatyn sý qubyry aýystyrylýda. Búgingi kúnge deıin 124 metr qubyr tartyldy. Jumystardy aıaqtaý 2025 jyldyń qarashasyna josparlanǵan. Ákim jumysty kúsheıtip, jedeldetýdi tapsyrdy.
Ekinshi kezeńde 1 790 metr sý qubyry aýystyrylyp, 33 qudyq ornatylady. Qazirdiń ózinde 1 shaqyrym qubyr tóselip, 14 qudyq ornatyldy. Joba 2025 jyldyń jeltoqsanynda tolyq aıaqtalady. Bul jumystar apattyq jaǵdaılardy azaıtyp, Bostandyq aýdany turǵyndaryn úzdiksiz aýyz sýmen qamtamasyz etýge múmkindik beredi.
Sapardyń sońǵy nysany – Bostandyq aýdanyndaǵy TK 4-2 jylý toraby men «Almagúl-Ońtústik» sorǵy stansıasynyń arasyndaǵy jylý jelilerin qaıta jańǵyrtý boldy. Jobanyń tapsyrys berýshisi – Almaty qalasynyń Energetıka jáne sýmen jabdyqtaý basqarmasy. Jeliniń jalpy uzyndyǵy – 1,2 shaqyrym, onyń ishinde 0,6 shaqyrymy bıyl jańartylady.
Bul jylý trassasy 1976 jyly paıdalanýǵa berilgen. Ol 150-den astam kópqabatty úıdi, sondaı-aq bilim berý, densaýlyq saqtaý jáne áleýmettik nysandardy jylýmen jáne ystyq sýmen qamtamasyz etedi. Tekserý qorytyndysy boıynsha jeliler tolyq tozǵan dep tanylyp, aýystyrýdy qajet etedi.
«Eń bastysy – merdigerler sapany qatań saqtaýy tıis. Merzim naqty belgilengen, jumystar ýaqytynda aıaqtalýy qajet», – dep túıindedi Darhan Satybaldy.
Aıta keteıik, barlyq nysan qala ákiminiń erekshe baqylaýynda. Jobalardyń júzege asýy turǵyndardy sapaly aýyz sýmen, kárizben jáne jylýmen qamtamasyz etip, halyqtyń turmys sapasyn arttyrady.