Erbolat Dosaev almatylyqtardy Pasqa merekesimen quttyqtady, dep habarlaıdy aqshamnews.kz
Qala basshysy almatylyqtardy Hrıstostyń qaıta tirilýi – Pasqa merekesimen quttyqtap, beıbit aspan, mol baqyt, zor densaýlyq jáne amandyq tiledi.
«Bul kóktemgi mereke – meıirimdilik, úmit pen rýhanı jańǵyrýdyń sımvoly. Ol árdaıym qurmet, beıbitshilik pen ózara túsinistik atmosferasynda atalyp ótedi. Pasqa júregimizdi senimmen toltyryp, ıgi isterge shabyttandyrady, ádiletke, meıirimdilikke jáne ózara qoldaýǵa umtylysymyzdy nyǵaıtady. Bul – urpaqtan-urpaqqa jetken dástúrlerdiń kúshi men jaqyn jandardyń jylýy men qoldaýynyń mańyzdylyǵyn erekshe sezinetin kezeń.
Almaty – túrli ulttar men din ókilderi úshin ortaq úıimiz. Pasqa sekildi ıgi merekeler birlikte bolýǵa, bir-birimizge qurmetpen qarap, qoldaý kórsetýge bolatynyn eske salady.
Dál osyndaı qundylyqtar súıikti qalamyzdyń beıbitshiligi, kelisimi men turaqty damýynyń negizin qalaıdy.
Osy jarqyn kúni Sizge jáne jaqyndaryńyzǵa zor densaýlyq, jan tynyshtyǵy, jylýlyq pen baq-bereke tileımin. Úıińiz mahabbat pen qamqorlyqqa, úılesim men jaılylyqqa toly bolsyn», – dedi Almaty ákimi Erbolat Dosaev.