Kezdesýge 550-den astam adam keldi.
Almaty ákimi Erbolat Dosaevtyń halyqpen kezekti kezdesýi Medeý aýdanynda ótti, dep habarlaıdy Almaty-akshamy.kz
Qala basshysy aýdannyń damýy jáne turǵyndardan kelip túsken usynystar boıynsha atqarylǵan jumystar týraly aıtty. Aýdanda komýnaldyq ınfraqurylymdy jańǵyrtý ózekti másele bolyp qala beredi. «Dýman» shaǵynaýdanynda sorǵy stansıasy men 1800 tekshe metrli eki rezervýar qaıta jańartylýda. Jumystardy aǵymdaǵy jyldyń sońyna deıin aıaqtaý josparlanǵan. Sondaı-aq, jeltoqsanǵa deıin «Iýbıleınyı» shaǵynaýdanynda jáne Gornaıa, Batýrın, Begalın kóshelerinde uzyndyǵy 2,6 km káriz jelilerin tapsyrý josparda bar. 2023 jyldyń birinshi jáne ekinshi toqsanyna arnalǵan josparda «Kensaı», «Kamenskoe plato», «Muztaý» jáne «Kólsaı» shaǵynaýdandarynda sýmen jabdyqtaý jáne sý burý jelilerin salý qarastyrylǵan.
Turǵyndardy úzdiksiz elektr qýatymen qamtamasyz etý úshin aýdanda 16,8 km jeli qaıta jańartyldy. Jyl sońyna deıin 17 km elektr berý jelilerin jańǵyrtýdy aıaqtaý jáne 18 kóshege syrtqy jaryqtandyrýdy júrgizý josparlanýda. 2023 jyldyń sońyna deıin aýdanda taǵy 37 kóshede jaryqtandyrý máseleleri sheshiledi.
Qala ákimi Erbolat Dosaevtyń aıtýynsha, aýdandaǵy joldardyń paıdalaný sıpattamalaryn jaqsartý úshin jalpy uzyndyǵy 21,4 km bolatyn 29 kóshege ortasha jóndeý jumystary júrgizilýde.
Oqýshy oryndarynyń tapshylyǵy máselesin sheshý úshin aýdanda №48 jáne №131 mektep-lıseıine kúrdeli jóndeý júrgizilýde. Birinshi mektep boıynsha jumystardy aǵymdaǵy jyldyń 30 qarashasyna deıin, ekinshi nysandy 2023 jyldyń 3-toqsanynda aıaqtaý josparlanǵan. Budan basqa, №131, №35 jáne №99 mektepter boıynsha 2023 jyldyń 2-toqsanynda 800 jańa orynǵa 3 qosalqy nysan salýǵa JSQ ázirleý aıaqtalady. «Dýman» shaǵynaýdanynda 1 200 oryndy jańa mektep salynady. Qurylystyń bastalýy kelesi jyldyń 2-toqsanyna josparlanǵan.
Mektepke deıingi uıymdardaǵy tapshylyqty qysqartý maqsatynda aǵymdaǵy jyly jańa 135 oryn ashý úshin №114, №116 jáne №141 memlekettik balabaqshalarda kúrdeli jóndeý jumystary aıaqtaldy. Bıylǵy jyly aýdanda qosymsha 457 oryndyq 10 jańa jeke menshik balabaqsha ashyldy, sondaı-aq jyl sońyna deıin 250 oryndyq taǵy bir jeke menshik balabaqsha ashý josparlanǵan.
«Keńsaı» shaǵynaýdanynda medısınalyq qyzmet kórsetýdiń qadamdyq qoljetimdiligin qamtamasyz etý úshin aýysymyna 120 kelýshige arnalǵan jańa otbasylyq-dárigerlik ambýlatorıa salynýda. Atalǵan nysan aǵymdaǵy jyldyń sońyna deıin paıdalanýǵa beriledi. "Dýman" shaǵynaýdanynda aýysymyna 500 kelýshige arnalǵan jańa emhana salynady. Qurylys-montaj jumystarynyń bastalýy 2023 jyldyń 3 toqsanyna josparlanǵan.
Medeý aýdanynyń turǵyndaryn sport nysandarymen qamtamasyz etý jumystary jalǵasýda. Jyl sońyna deıin «Alataý» shaǵynaýdanynda jobalyq qýaty 150 adamǵa arnalǵan dene shynyqtyrý-saýyqtyrý kesheni ashylady.
Sondaı-aq, qala ákimi Erbolat Dosaev «Halyq qatysatyn búdjet» baǵdarlamasynyń iske asyrylý barysy týraly habardar etti. 2022 jyly 800 mln teńgege 19 joba irikteldi. Onyń 18-i aıaqtaldy, 1 joba boıynsha jumystanýda. Bul joba - Tiksaı ózeniniń jaǵalaýyn abattandyrý, ony paıdalanýǵa berý aǵymdaǵy jyldyń qazan aıyna josparlanǵan.
Almaty ákimimen kezdesý barysynda turǵyndar joldardy jóndeý, káriz jáne elektr jelilerin abattandyrý jáne t.b. máselelerdi kóterdi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýdiń jańa formatyna sáıkes, jyl sońyna deıin Erbolat Dosaev halyqpen 24 kezdesý ótkizedi – 8 aýdannyń árqaısysynyń turǵyndarymen toqsanyna bir kezdesý.